रायपुर, मुख्यमंत्री श्री भूपेश बघेल ले काली संझा इहां ऊंखर निवास कार्यालय म छत्तीसगढ़ म बैडमिंटन के सबो वर्ग के नेशनल चैम्पियन कु. आकर्षि कश्यप ह सौजन्य मुलाकात करिस। कु. आकर्षि कश्यप ल हाले म राष्ट्रमंडल गेम्स 2022 बर्किंघम म बैडमिंटन के टीम चैम्पियनशिप म सिल्वर मेडल मिले हे। जानबा हे कि कु. आकर्षि कश्यप छत्तीसगढ़ के पहली बैडमिंटन खिलाड़ी हे, जे ह राष्ट्रमंडल गेम्स 2022 म भाग लेहे हे।
मुख्यमंत्री श्री बघेल ह कु. कश्यप ल ये उपलब्धि बर बधाई अऊ शुभकामना दीन। उमन कहिन कि कु. कश्यप ह अपन खेल प्रतिभा ले पूरा छत्तीसगढ़ ल गौरवान्वित करे हे, जेन हम सबो प्रदेशवासी मन बर गौरव के बात ये। उमन कु. आकर्षि ल उंखर उपलब्धि के प्रोत्साहन बर राज्य शासन कोति ले शासकीय नौकरी प्रदान करे बर आश्वस्त करिन। मुख्यमंत्री श्री बघेल ल ये बेरा म कु. आकर्षि कश्यप ह राष्ट्रमंडल गेम्स 2022 म भारत बर पदक जीतइया सबो खिलाड़ी मन के हस्ताक्षर सहित टी-शर्ट उपहारस्वरूप भेंट करिन।
जानबा हे कि 21 वर्षीय कु. आकर्षि कश्यप दुर्ग जिला के निवासी ये। ओ ह छत्तीसगढ़ म बैडमिंटन खेलत बैडमिंटन के सबो वर्ग के नेशनल चैम्पियन रहे हे। अंडर-13,15,17,19 म गोल्ड मेडल अऊ सीनियर नेशनल म घलोक पदक हासिल करे हे। ओ ह एशियन जूनियर अऊ वर्ल्ड जूनियर म घलोक टीम इंडिया के सदस्य रहे हे। एखर अलावा कु. कश्यप खेलो इंडिया म घलोक विजेता रहे हे। ओ ह इंडोनेशिया एशियन गेम्स 2018 म भारतीय बैडमिंटन दल के सदस्य घलोक रहे हे। कु. कश्यप साउथ एशियन गेम्स नेपाल म आयोजित खेल प्रतियोगिता म घलोक विजेता रहे हे। संगेच ओ ह इंडियन बैडमिंटन के सीनियर वूमेन्स के सिंगल के पहिली रैंक म काबिज रहे हे। ओ ह एशिया टीम चैम्पियनशिप फिलीपीन्स 2022 अऊ एशिया चैम्पियनशिप मलेशिया 2022 म घलोक भारतीय दल के सदस्य रहिस। हाल म ओ ह बैकांक म आयोजित थामस व्ही उबेर कप म सम्मिलित रहिस। कु. आकर्षि कश्यप ल ओलपिंक के 2024-2028 म सामिल करे गए हे। छत्तीसगढ़ शासन ह ओ ल खेल पुरस्कार म सर्वोपरि गुण्डाधूर पुरस्कार अऊ शहीद कौशल पुरस्कार ले सम्मानित करे हे। ये बेरा म विधायक श्री देवेन्द्र यादव अऊ डॉ. संजीव कश्यप घलोक उपस्थित रहिन।
