मुख्यमंत्री ह कहिन – सेवा करे ले मिलथे सिरतोन के खुशी
रायगढ़, मुख्यमंत्री श्री भूपेश बघेल ले आज राजपुर म भेंट मुलाकात के समय आत्मानन्द अंगरेजी माध्यम स्कूल के छात्रा शालिनी मिश्रा ह पूछिस के सर आप मन के हर पल मुस्कुरात चेहरा के राज का हे। मुख्यमंत्री श्री बघेल ह कहिन कि मुस्कुराए के गुण भगवान ह सिरिफ हम मनुष्य मन ल ही देहे हे, तूं मन कभू कोनो पशु ल मुस्कुरात नइ देखे होहू। उमन कहिन कि हमला केवल मुस्कुराए बर ही बनावटी रूप ले नही मुस्कुराना चाही। हमला अपन काम ल एंजॉय करत काम करना चाही। हमला अपन माता-पिता, बड़े-बुजुर्ग अऊ बीमार मन के सेवा करना चाही। सेवा भाव ले काम करे ले मुस्कुराहट खुद ब खुद आथे। जब मैं मनखे मन के सेवा करथंव, मोला खुशी मिलथे अऊ मोर चेहरा म मुस्कुराहट आथे। वइसनहे आप मन ल घलोक बिना कोनो तनाव के अपन पढ़ाई खुशी ले करना चाही जेखर से आप मन के चेहरा म घलोक मुस्कुराहट बने रइही। छात्रा ह मुख्यमंत्री ल बताइस कि स्कूल म टीचर के कमी हे, त मुख्यमंत्री ह कहिन कि कमी दूर करबो।
