कोरबा, कोरबा जिला के महिला मन आर्टिफिशियल ज्वेलरी निर्माण बर बड़े शहर अऊ वृहद उद्योग मन उपर निर्भरता के बात ल गलत साबित करत हें। जिला म बिहान समूह के महिला मन नवाचार के बेहतरीन नमूना पेश करत गांव म ही आर्टिफिशियल ज्वेलरी के निर्माण करत हें। समूह के महिला मन ज्वेलरी निर्माण ले जुड़के स्वरोजगार अऊ स्वावलंबन के मिसाल पेश करत हें। विकासखंड कोरबा के ग्राम रजगामार के 15 दीदी मन आजीविका संवर्धन बर आर्टिफिशियल ज्वैलरी निर्माण म लगे हें। राष्ट्रीय आजीविका मिशन के तहत सीता महिला ग्राम संगठन कि महिला मन चूड़ी, कंगन, झुमका आदि के सुंदर अऊ आकर्षक नमूना बनाके ना सिरिफ नवाचार करत हें, भलुक आर्थिक रूप ले घलोक मजबूत होए के रद्दा अपनावत हें। ये काम ले समूह के महिला मन के आत्मविश्वास बाढ़े हे। संगेच ये ह आन मनखे मन बर घलोक प्रेरणा के स्रोत साबित होवत हे।
नूतन कुमार कंवर, मुख्य कार्यपालन अधिकारी जिला पंचायत ह बताइस के समूह के महिला मन बड़ मेहनत अऊ लगन ले आर्टिफिशियल ज्वेलरी बनाए के काम म लगे हें। महिला मन के बनाए गए ज्वेलरी बहुतेच सुंदर अऊ आकर्षक हे। उमन महिला मन के उत्साहवर्धन करत स्वसहायता समूह के महिला मन के आर्टीफिशियल ज्वेलरी ल बाजार उपलब्ध कराए बर सीमार्ट म रखे के निर्देश एनआरएलएम ल देहे हें। एखर संगेच आर्टीफिशियल ज्वेलरी के व्यवसाय विकास बर बैंक ले सहयोग कराए के निर्देश देहे हें।
सीता महिला ग्राम पंचायत रजगामार के अध्यक्ष श्रीमती कविता श्रीवास अउ रजिया बेगम ह बताइस कि ऊंखर ग्राम संगठन के 15 महिला मन आकर्षक रंग बिरंगी चूड़ी, कंगन, माथाटीका, राधा सेट जेन कि (फोम अउ फ्लावर) ले बनाय गए हे जेन ल हल्दी कार्यक्रम म महिला मन पहिरथें। कान के बाली, झुमका, मोती वाले ब्रेसलेट, अंगूठी चोकरहार (मोतीहार) गला के पेडेंट मोतीवाला, मंगलसूत्र, करधन, बाजूबंध आदि ज्वेलरी उमन सामूहिक रूप ले तियार करे हें। ये ज्वेलरी उमन मात्र 75 घंटा म तियार करे हें, जेकर बाजार मूल्य 20 हजार रूपिया ले जादा मिले के आशा हे। ग्राम संगठन के महिला मन ह अपन रोजाना के काम मन ले फुरसत होके मंझनिया 2 बजे ले 5 बजे तक सामुदायिक भवन म ज्वेलरी तियार करे हें। महिला मन के तियार ये आर्टीफिसियल ज्वेलरी ल फैंसी स्टोर रजगामार म बिक्री बर रखे गए हे। उमन बताइन कि म ये ज्वेलरी बाजार दर ले सस्ता मूल्य म आर्कषक रूप म उपलब्ध हे।
