जांजगीर-चाम्पा, छत्तीसगढ़ सरकार कोति ले राज्य म जैविक खेती ल बढ़ावा देहे, कृषि के लागत ल कम करे अऊ रासायनिक कीटनाशक मन के खेती किसानी म कम से कम उपयोग करे बर सरलग सार्थक पहल करे जात हे। इही कड़ी म मुख्यमंत्री श्री भूपेश बघेल के विशेष पहल म 28 जुलाई, हरेली पर्व ले पूरा प्रदेश म गोमूत्र के खरीदी 4 रुपए प्रति लीटर के दर ले करे जात हे। हरेली पर्व ले शुरू होए गोमूत्र खरीदी म जांजगीर-चांपा जिला अब तक 5 हजार तिरानवे लीटर के खरीदी होए हे जे ह पूरा प्रदेश म पहिली स्थान म हे।
एखर संगेच कलेक्टर श्री तारन प्रकाश सिन्हा के कुशल मार्गदर्शन म जांजगीर-चांपा जिला म स्व सहायता समूह के महिला मन ह गोमूत्र ले जीवामृत अऊ ब्रह्मास्त्र कीटनाशक बनाके अपन आय के स्रोत म वृध्दि करत हें। जेखर से उंखर आर्थिक स्थिति घलोक अऊ बेहतर होवत हे। जिला म स्व सहायता समुह के महिला मन ह गोमूत्र ले बने उत्पाद बेचके करीबन 82 हजार रुपए के लाभ प्राप्त करे हें। रासायनिक कीटनाशक के जगा गोमूत्र ले बने उत्पाद जीवामृत अऊ ब्रह्मास्त्र खेती किसानी बर जादा फायदेमंद हे। एखर रोग प्रतिरोधक क्षमता रासायनिक कीटनाशक ले कई गुना जादा हे।
गोमूत्र खरीदी अऊ गोमूत्र ले कीटनाशक निर्माण करे ले स्व सहायता समूह के महिला मन ल घलोक आय के एक नवा जरिया प्राप्त होए हे। एखर तहत जांजगीर- चाम्पा जिला के दू गोठान विकासखंड अकलतरा के तिलाई अउ विकासखंड नवागढ़ के खोखरा गोठान म गोमूत्र खरीदी के काम करे जात हे। तिलई गोठान म स्व सहायता समूह के महिला मन गोमूत्र ले 200 लीटर जीवामृत अऊ 721 लीटर ब्रह्मास्त्र बनाके 646 लीटर उत्पाद बेचके कुल 30 हजार 300 रुपए के लाभ प्राप्त करे हें। अइसनहे खोखरा गोठान म सागर स्व सहायता समूह के महिला मन गोमूत्र ले अब तक 724 लीटर ब्रह्मास्त्र अऊ 400 लीटर जीवामृत के उत्पाद बेचके 52 हजार 200 रुपए के लाभ प्राप्त करे हें। समूह के महिला मन ह बताइन कि गोठान के माध्यम ले अब तक केवल गोबर खरीदी करके अऊ ओखर से बने उत्पाद बेचे जात रहिस फेर अब गोमूत्र के उपयोग करके उत्पाद तियार करे ले आय के नवा स्रोत के सृजन होए हे।
जांजगीर-चांपा जिला प्रदेश म गोमूत्र खरीदी म हे पहिली नम्बर म
जैविक खेती ल बढ़ावा देहे बर हरेली पर्व ले गोठन मन म गोमूत्र के खरीदी करे जात हे। जेखर तहत जांजगीर-चांपा जिला अब तक 5 हजार 93 लीटर गोमूत्र खरीदी करे गए हे। अइसनहे 2 हजार 9 सौ 26 लीटर के गोमूत्र खरीदी के संग कबीरधाम जिला दूसर नम्बर म, 2 हजार 9 सौ 93 लीटर गोमूत्र खरीदी के संग कोरिया जिला तीसर नम्बर म हे अऊ 2 हजार 3 सौ 84 लीटर गोमूत्र खरीदी के संग रायपुर जिला चौथईया नम्बर म हे।
