छत्तीसगढ़ सरकार कोति ले औद्योगिक नीति 2019-24 म संशोधन ले बदलिस तस्वीर
कृषि अऊ वन आधारित उद्योग मन ल देहे जात हे प्राथमिकता
एम.एस.एम.ई सेक्टर ल बढ़ावा, 19 हजार करोड़ रूपिया ले जादा के निवेश आइस
रायपुर, छत्तीसगढ़ म बीते पौने चार साल म उद्योग-व्यापार क्षेत्र मन बर सकारात्मक वातावरण तियार होए ले जिहां एक कोति उद्योग-व्यापार ल रफ्तार मिले हे, उहें दुसर कोति रोजगार के अवसर घलोक बाढ़े हे। एखर बर छत्तीसगढ़ सरकार ह नवा औद्योगिक नीति 2019-24 के घोषणा करत समय-समय म बहुत अकन जरूरी संशोधन घलोक करे हे। राज्य म बड़े उद्योग मन के स्थापना अऊ संचालन ल प्रोत्साहित तो करेच जात हे संगें म कृषि अऊ वन आधारित उद्योग मन ल प्राथमिकता देहे जात हे। उहें नवा औद्योगिक नीति म वंचित वर्ग मन बर बहुत अकन प्रावधान करे गए हे। जानबा हे कि ईज़ ऑफ डूइंग बिजनेस के मापदंड मन म छत्तीसगढ़ देश के पहिली 6 राज्य मन म सामिल हे।
छत्तीसगढ़ म प्राथमिक क्षेत्र (कृषि, वानिकी, पशुपालन, मत्स्य पालन) ल आजीविका के साधन बनाए ले लेके आय के बड़े स्त्रोत के रूप म तियार करे बर बहुत अकन अभिनव प्रयास होवत हे। उहें सेवा क्षेत्र मन म विस्तार करके एक विजन के संग राज्य के विकास के गति ल बढ़ाए के प्रयास घलोक बीते चार बछर म करे गए हे। एखर बर मुख्यमंत्री श्री भूपेश बघेल के नेतृत्व म राज्य सरकार ह सबले पहिली छत्तीसगढ़ म औद्योगिक नीति म जरूरी संशोधन करे गीस, जेखर से उद्योग-व्यापार ल बढ़ावा मिलय अऊ छत्तीसगढ़ के तस्वीर बदल सकय। नवा औद्योगिक नीति म फूड, एथेनॉल, इलेक्ट्रॉनिक्स, डिफेंस, दवा, सोलर जइसे नवा उद्योग मन ल प्राथमिकता देहे गए हे।
