आयोग के ऑनलाईन वेबपोर्टल के लोकार्पण अउ कार्यशाला 12 अकटूबर के
रायपुर, भारत म छत्तीसगढ़ छठवां राज्य ये, जिहां आवेदक अपन सूचना के अधिकार के तहत आवेदन ल ऑनलाईन तीनों स्तर म (जनसूचना अधिकारी, पहिली अपीलीय अधिकारी अउर दूसर अपील) लगा सकत हें। छत्तीसगढ़ शासन कोति ले आयोग बर rtionline.cg.gov.in वेबसाईट तियार कराए गए हे, जेमां आवेदक अपन आवेदन जनसूचना अधिकारी, पहिली अपीलीय अधिकारी अउ आयोग के आगू दूसर अपील ऑनलाईन भेज सकहीं। राज्य सूचना आयोग म सूचना के अधिकार अधिनियम 2005 के अन्तर्गत ऑनलाईन वेबपोर्टल (rtionline.cg.gov.in) के साफ्टवेयर के लोकार्पण 12 अकटूबर 2022 के मंझनिया 12 बजे करे जाही।
राज्य मुख्य सूचना आयुक्त श्री एम के राउत ह बताइस कि माननीय सर्वोच्च न्यायालय कोति ले प्रकरण नंबर 1040/ 2019 प्रवासी लीगल सेल बनाम भारत संघ अउ आन म छत्तीसगढ़ शासन ल घलोक नोटिस जारी करे रहिस कि सूचना के अधिकार अधिनियम, 2005 के तहत आवेदन प्राप्ति बर ऑनलाईन पोर्टल के निर्माण करव। केन्द्रीय सूचना आयोग कोति ले अउ कुछ राज्य मन म ऑनलाईन बेवपोर्टल बनाए गए हे, जिहां सूचना के अधिकार अधिनियम, 2005 के तहत आवेदक जनसूचना अधिकारी/प्रथम अपीलीय अधिकारी अउ दूसर अपील आवेदन मन ल ऑनलाईन प्रेषित कर सकथें। एकरे संग अधिनियम के तहत वांछित शुल्क घलोक ऑनलाईन जमा करे जा सकत हे। आयोग म दूसर अपील प्रस्तुत करे बर पोर्टल म आवेदक खुद के रजिस्ट्रेशन करे के बाद जनसूचना अधिकारी, पहिली अपीलीय अधिकारी अउ आयोग म दूसर अपील ऑनलाईन भेज सकत हें। उमन बताइन कि राज्य के दूरदराज क्षेत्र के नागरिक मन ल एकर लाभ मिल सकही। आवेदक आवेदन आनलाईन अपलोड करे के संगें-संग ऑनलाईन शुल्क जमा कर सकत हें। एखर से आवेदक मन ल नॉन ज्यूडिशियल स्टाम्प/बैंक ड्राफ्ट/पोस्टल आर्डर/मनीआर्डर करे के जरूरत नइ परय। संगेच विभागीय कार्यालय मन म खुद जाके आवेदन जमा करे या डाक के माध्यम ले आवेदन भेजे के घलोक जरूरत नइ परय।
