जशपुरनगर : राजीव गांधी भूमिहीन मजदूर न्याय योजना ले जरूरतमंद परिवार ल मिलत हे लाभ

जशपुरनगर, छत्तीसगढ़ सरकार राज्य के जरूरत मंद मनखे अउ परिवार बर सरलग कई ठन योजना के माध्यम ले ओ मन ल लाभांवित करके ऊंखर आर्थिक स्थिति ल सुदृढ़ करे म प्रयासरत हे। प्रदेश सरकार कोति ले राजीव गांधी ग्रामीण भूमिहीन कृषि मजदूर न्याय योजना पौनी-पसारी व्यवसाय ले जुड़े मनखे अऊ भूमिहीन कृषि मजदूर मन ल आर्थिक मदद देहे अउ उंखर उन्नति बर संचालित करे जात हे। जेखर से पात्र हितग्राही मन ल आर्थिक रूप ले मदद मिल सकय।
योजना के तहत् भूमिहीन कृषि मजदूर मनखे जिंकर तिर खेती के जमीन नइ हे संगेच जिंकर जीविका के मुख्य साधन शारीरिक श्रम करना हे अइसन परिवार ल हर साल 7 हजार रूपिया देहे जात हे। ग्रामीण भूमिहीन कृषि मजदूर परिवार के अंतर्गत चरवाहा, बढ़ई, लोहार, मोची, नाई, धोबी, पुरोहित जइसे परंपरागत व्यवसाय अउ वनोपज संग्राहक परिवार ल लाभ देहे जात हे। संगेच पुजारी, बैगा, गुनिया, मांझी, हाट पहरिया, बाजा मोहरिया वर्ग के पात्र मनखे मन ल घलोक योजना ले लाभांवित करे जात हे।
जिला के मनोरा पंचायत निवासी अभिमन्यु सन्यासी ह बताइस कि ओ मन ल राजीव गांधी ग्रामीण भूमिहीन कृषि मजदूर न्याय योजना के तहत 2 हजार रूपिया मिले हे। पहिली घलोक ओ ल योजना के तहत सहायता राशि मिले रहिस। हितग्राही हेमंतराम ह बताइस कि ये योजना आर्थिक रूप ले कमजोर परिवार बर सहारा बने हे। एखर से ओ मन ल अकतहा आय होवत हे। वो ह बताइस कि वोखर पास खेती के जमीन नइ हे। ओखर परिवार के स्थिति आर्थिक रूप ले कमजोर हे ओ मन मेहनत मजदूरी करके अपन परिवार के जीवन यापन करत हें। अभिमन्यु ह बताईस कि परिवार के मुखिया होए के सेती अपन परिवार के भरण पोषण करना अउ उंखर जरूरत के खियाल रखना वोखर जिम्मेदारी हे। उमन बताइस कि मजदूरी ले जेन आमदनी होथे ओखर से परिवार के सिरिफ गुजारा हो पाथे फेर उंखर जरूरत पूरा करे म ओ ल परेसानी होथे। वोकर बताती के भूमिहीन मजदूर परिवार बर प्रदेश सरकार ह बहुतेच सहरा के लईक योजना चालू करे हे। हमन ल ये योजना ले आर्थिक रूप ले मजबूती मिलत हे। अभिमन्यु ह प्रदेश सरकार ल राजीव गांधी ग्रामीण भूमिहीन कृषक मजदूर न्याय योजना चालू करे बर धन्यवाद देवत कहिस कि ये योजना ले वोखर परिवार ल आर्थिक संबल मिलत हे।