वेद-पुराण अऊ संत-महात्मा मन के संदेश हमला बने रद्दा देखाथे- राज्यपाल सुश्री उइके
रायपुर, राज्यपाल सुश्री उइके ह राजधानी रायपुर म आयोजित पांच दिवसीय श्री शिवमहापुराण के पावन कथा कार्यक्रम के शुभारंभ के बेरा म संघरिन। राज्यपाल ह कहिन कि पं.प्रदीप मिश्रा के श्रीमुख ले शिवमहापुराण कथा के श्रवण सबो बर सौभाग्य के अवसर हे। उमन कहिन कि हमार वेद-पुराण प्राचीन ग्रंथ मन के संदेश अऊ संत-महात्मा मन के उपदेश हमला सही रद्दा म चले ल बताथे। उमन प्रसिद्ध कथावाचक पं. प्रदीप मिश्रा जी के छत्तीसगढ़ आके इहां श्री शिवमहापुराण के पावन कथा वाचन करे बर धन्यवाद दीन। ये पावन अवसर म महिला बाल विकास मंत्री श्रीमती अनिला भेड़िया, गौसेवा आयोग के अध्यक्ष महंत श्री रामसुंदर दास, विधायक श्री सत्यनारायण शर्मा, श्री विकास उपाध्याय, श्री कुलदीप जुनेजा अउ बड़ संख्या म श्रद्धालुगण उपस्थित रहिन।
राज्यपाल सुश्री उइके ह कथा सुने बर सकलाए सभा ल संबोधित करत कहिन कि हमार देश म प्राचीनकाल ले जब-जब अधर्म अऊ अत्याचार बाढ़े हे तब-तब संत मन ह कोनो न कोनो रूप म मार्गदर्शन करे हें। उमन कहिन कि अइसनहे वेद-पुराण के वाचन अउ धार्मिक आयोजन ले सद्भाव के वातावरण निर्मित होथे। उमन कहिन कि अभी हाल के समय म जब मनखे कई प्रकार के रोग अऊ मानसिक तनाव के दौर ले गुजरत हें। अइसे म प्राचीन पुराण अउ ग्रंथ के श्रवण हमार चित्त ल शांति अउ एकाग्रता प्रदान करथे। उमन बताइन कि शिव पुराण के संबंध म मान्यता हे कि जेन भक्त भगवान शिव के आराधना करथे, शिव पुराण के पाठ करथे या करवाथे या फेर पूर्ण श्रद्धा अउ भक्ति भाव के संग शिव पुराण कथा के श्रवण करथे, भगवान शिव ओखर कल्याण करथे। ये पवित्र कथा के सुने मा़त्र ले पुण्य के प्राप्ति होथे। मनोकामना मन पूरा हो जाथे अऊ मनखे के जम्मो कष्ट अऊ पाप नष्ट हो जाथे। राज्यपाल ह ये बेरा म पं.प्रदीप मिश्रा के छत्तीसगढ़ आगमन म ओ मन ल स्मृति चिन्ह देके सम्मानित करिन।
