मुख्यमंत्री श्री बघेल ह रेलवे ओवर ब्रिज के करिन लोकार्पण

महासमुंद, मुख्यमंत्री श्री भूपेश बघेल ह प्रदेशव्यापी भेंट-मुलाक़ात कार्यक्रम के बेरा म आज महासमुंद-तुमगांव रोड के रेलवे ओवर ब्रिज के फ़ीता काटके लोकार्पण करिन। ये बेरा म गृह व अउ जिला के प्रभारी मंत्री श्री ताम्रध्वज साहू, संसदीय सचिव व विधायक महासमुंद श्री विनोद चंद्राकर संग रहिन।
तुमगांव ओवरब्रिज आम जनता बर अड़बड़ जरूरी रहिस। ये रेलवे पुल के बन जाय ले शहर वासी मन ल सरलग लगइया ट्रेफ़िक जाम अऊ आए-जाए म होवइया दिक्कत ले छुटकारा मिल जाही। ज़िला के जनता ख़ासकर तुमगाँव कोति ले अऊ महासमुंद कोति ले रोज़ अवया जवइया जनता ल सरल, सुगम मार्ग मिलही। अभी हाल म रेलवे फाटक बंद के सेती जाम के स्थित बन जात रहिस। रेलवे ओवरब्रिज बन जाय ले ओ मन ल एखर से निजात मिलही अऊ समय के घलोक बचत होही।
जानबा हे कि तुमगांव रेलवे ओवरब्रिज बन जाय ले महासमुंद के क़रीबन 35 हजार ले जादा आबादी ल सुविधा मिलही। मिले जानकारी के मुताबिक 40 करोड़ के लागत ले बन के तियार होही। ये मां भू-अर्जन के राशि सामिल नइ हे। वो राशि अलग ले हे। ओवरब्रिज के कुल लंबाई 616 मीटर अऊ चौड़ाई 15 मीटर हे। रेलवे क्रॉसिंग ले महासमुंद कोति 294 मीटर अऊ तुमगांव कोति 248 मीटर अऊ रेलवे क्रॉसिंग के लंबाई 74 मीटर हे।