बिलासपुर : मनरेगा ले बनिस डबरी, अब लहलहा वत हे फसल

बिलासपुर, जिला म महात्मा गांधी नरेगा के काम मन ले ग्रामीण क्षेत्र मन म सकारात्मक बदलाव आवत हे। पाछू चार बछर म सरकार कोति ले मनखे मन के बेहतरी बर होवत उदीम के बदौलत गांव वाले मन के दशा अऊ दिशा बदल गए हे। अब न केवल ओ मन ल रोजगार मिलत हे भलुक ऊंखर जीवन स्तर म घलोक सुधार आए हे। इही कड़ी म मनरेगा योजना (महात्मा गांधी राष्ट्रीय ग्रामीण रोजगार गारंटी योजना) के तहत हितग्राही मन के बाड़ी म डबरी अऊ कुंआ बनाए जात हे। बाड़ी म डबरी अऊ कुंआ बन जाय ले किसान मन के सिंचाई के समस्या के समाधान होवत हे।
जनपद पंचायत तखतपुर के ग्राम पंचायत राजपुर के किसान श्री लाला राम ओ हितग्राही ये जिनला ये योजना के लाभ मिले हे। लालाराम के आर्थिक स्थिति बने नइ रहिस। वोखर तिर करीबन एक एकड़ जमीन रहिस। अब उहां डबरी बन जाय ले वोखर सिंचाई बर पानी के चिंता दूर हो गए हे। डबरी म पानी रहे ले लालाराम सब्जी तरकारी के खेती करत हे, जेखर से वोखर आमदनी बाढ़े हे। पहिली सिंचाई बर पानी नइ रहे के सेती ओ ह खेती नइ कर पात रहिस। पानी के समस्या ले ओ ह सरलग जूझत रहिस। ये बीच ओ ल प्रशासनिक अमला ले जानकारी मिलीस के मनरेगा के तहत डबरी निर्माण कराए जा सकत हे। लालाराम बर ये योजना वरदान साबित होइस। लालाराम अऊ वोखर परिवार बर सरकारी योजना नवा उम्मीद बनके आए हे। वो ह बताइस कि योजना के लाभ मिले के बाद अब तक ओ ह डबरी के मेढ़ म राहेर के 2 फसल ले डरे हे। एखर अलावा मेढ़ के तीर अऊ बगल के जमीन म पपीता, अमरूद, केला, जामुन, अनार अउ कई प्रकार के सब्जि सेमी, प्याज, लाल भाजी, पालक, धनिया, मेथी, टमाटर आदि फसल लगाय ले ओ ल अकतहा आमदनी घलोक होवत हे। भविष्य म डबरी म मछली पालन, बत्तख पालन अउ सिंघाड़ा के फसल लगाय के घलोक सोचत हे। शासन के ये योजना ले ओ ल ना केवल डबरी बनाए बर राशि स्वीकृत हो गे अऊ ये मां ओ मन ल रोजगार घलोक मिलीस। लालाराम कहिथे कि शासन के ये योजना ह वोखर जीवन म खुशहाली ला देहे हे।