नगरीय निकाय मन म विकास कार्य मन बर एक हजार करोड़ रूपिया देहे के घोषणा

रायपुर, मुख्यमंत्री श्री भूपेश बघेल ह आज राज्य के नागरिक मन ल एक हजार करोड़ रूपिया के विकास काम मन के महत्वपूर्ण सौगात दीन। मुख्यमंत्री ह नगरीय प्रशासन अऊ विकास विभाग के गौरव समागम-2023 म सामिल होत कहिन कि हमर सरकार म नागरिक मन ल घर बइठे सुविधा मिलत हे। एखर संगेच सबो नगरीय निकाय मन ह नागरिक सुविधा मन ल बेहतर करे हें। उमन कहिन कि हमर सरकार ह राशनकार्ड बनाए उपर सुधार करे हे। आज सबो के राशनकार्ड आसानी ले बन जात हे। पहिली भवन अनुज्ञा लेहे म बहुत मुश्किल होत रहिस फेर अब एकर सरलीकरण करे गए हे। मुख्यमंत्री मितान योजना के तहत घर बइठे ही 15 प्रकार के सेवा मिलत हे ।
ये बेरा म मुख्यमंत्री श्री भूपेश बघेल ह सबो नगरीय निकाय मन ल विकास कार्य मन बर करीबन 1 हजार करोड़ रूपिया राशि देहे के घोषणा करिन। उमन नगर निगम रायपुर ल 100 करोड़, बिलासपुर नगर निगम ल 50 करोड़, दुर्ग नगर निगम ल 25 करोड़, भिलाई-चरौदा, अम्बिकापुर, जगदलपुर ल 20-20 करोड़, रिसाली, राजनांदगांव, रायगढ़ अऊ कोरबा ल 15-15 करोड़, बिरगांव, धमतरी अऊ चिरमिरी ल 10-10 करोड़ के राशि देहे के घोषणा करिन। एखर संगेच सबो नगर पालिका मन ल 5-5 करोड़ अऊ सबो नगर पंचायत मन ल 3-3 करोड़ रूपिया देहे के घोषणा करिन।