हीरापुर जरवाय गउठान म पहुंचिस मुख्यमंत्री, महिला मन संग करिस चरचा
रायपुर, नेहा राठौर के खबर/ मुख्यमंत्री श्री भूपेश बघेल आज भेंट-मुलाकात कारिकरम म हीरापुर जरवाय शहरी गउठान ल देखे बर गईन। ओ ह उहां गोबर ले पेंट बनाए के इकाई के घलो अवलोकन करिस, वर्मी कम्पोस्ट अउ पेंट निर्माण ले जुडे़ महिला मन संग चरचा घलो करिस।
मुख्यमंत्री श्री बघेल ल गोवर्धन महिला स्व-सहायता समूह के महिला मन ह बतईस के अभी तक ले 34.01 लाख किलो गोबर के खरीदी होए हे। ओमा ले 3 लाख 10 हजार किलो वर्मी खाद तियार करे गए हे। 6 लाख 30 हजार किलो सुपर खाद तियार करे गए हे। महिला मन ल अभी तक ले 18.90 लाख रूपिया के लाभांश मिले हे।
मुख्यमंत्री ह अवलोकन के बेर गऊठान परिसर म गोबर ले मशीन म पेंट निर्माण म लगे महिला समूह के सदस्य मन संग तको गोठ के के कईसे पेंट बनथे तेला बारीकी ले समझिस। समूह के महिला मन ह बतइस के गोबर ले बने पेंट बजार म बने आने पेंट ले गुणवत्ता म जादा बढ़िया रईथे, अउ संग म बजार म मिले वाले पेंट के तुलना म 25 से 30 प्रतिशत सस्ता घलो हे।
समूह के महिला मन ह बताइस हे अभी तक ले गोबर ले 17 हजार 200 लीटर पेंट बना डारे हे। जेमा के 15 हजार 700 लीटर ह बेचा घलो गए हे। पेंट बेच के अभी तक 23 लाख 70 हजार रूपिया मिले हावय, जेकर ले समूह ल 7 लाख 500 रूपिया के लाभ होए हे। मुख्यमंत्री ह संगे म गऊठान परिसर म इस्थित दोना-पतरी बनात महिला समूह मन करा घलो उखर काम के बारे म जानकारी लीहिस।
मुख्यमंत्री के संग म संसदीय सचिव श्री विकास उपाध्याय, रायपुर नगर निगम के महापौर श्री एजाज ढेबर समेत इस्थानीय जनप्रतिनिधि अउ गौठान ले जुडे़ स्व-सहायता समूह के महिला मन ह उपस्थित रहिन हे।
