232 आंगनबाड़ी केन्द्र म 3500 लईका मन ल हर हफ्ता म दू दिन दिए जाथ हे अंडा
रायपुर, नेहा राठौर के खबर/ मुुख्यमंत्री श्री भूपेश बघेल के पहल म प्रदेश म कुपोषण मुक्ति ब अभियान चलाय जाथ हे। ए अभियान म सहर ले दुरिहा दुरिहा के आदिवासी अउ पछवाए इलाका म लईका मन के कुपोषण ले मुक्ति ब बिसेस प्रयास करे जाथ हे। ए अभियान के बड़ बढ़िया परिणाम आए हावय। जशपुर जिला म कम बेसी कर के 600 कुपोषित लईका मन ह कुपोषण के दुष्चक्र ले बाहिर आ गए हावय। बताए लईक बात हे कि मुख्यमंत्री सुपोषण अभियान ले प्रदेश म लगभग 2 लाख 65 हजार लईका मन ह कुपोषण मुक्त हो गए हवय।
जिला के मनोरा, आस्ता, सन्ना, बगीचा चार परियोजना के 232 आंगनबाड़ी केन्द्र म खनिज न्यास निधि ले हफ्ता म दू दिन बुधवार अउ शुक्रवार के बिसेस पिछडे़ जनजाति के 3500 पहाड़ी कोरवा लइका मन ल अंडा बांटे के सुरआत करे गए हवय। अउ संग म लईका मन के बौद्धिक क्षमता ल बढ़ाए ब प्रारंभिक शिक्षा तको दिए जाथ हे।
महिला अउ बाल विकास अधिकारी ह बतइस के कुपोषण ल सिरवाए ब दूर आंगनबाड़ी केन्द्र के पर्यवेक्षक, आंगनबाड़ी कार्यकर्ता सहायिका मन ह घर घर जाके लईका के माता पिता मन ल जागरूक करत हे।
बिसेस पिछडे़ जनजाति पहाड़ी कोरवा के 600 लईका मन होइस कुपोषण मुक्त
