गांव म ही महिला मन ल रोजगार के संग मिलिस नवा पहिचान

गौठान म स्थापित रीपा बनाए के परिकल्पना अब साकार होवत हे
अकेल्ला गुडेलिया गांव म नारी शक्ति ग्राम समूह ल 2 लाख वर्गफीट पेवर ब्लॉक के मिलिस एडवांस ऑर्डर
रायपुर, 23 जून 2023
घरेलू काम मन म व्यस्त रहोईया कतको झन महिला मन सफलता के नवा कहानी लिखत हे। एमा बलौदाबाजार भाटापारा जिला के विकासखण्ड भाटापारा के ग्राम गुडेलिया अउ विकासखंड पलारी के ग्राम गिर्रा के महिला घलो शामिल हे। जे मन पेवर ब्लॉक बना के अपन राह मजबूत बनात हे। जिला म अइसने पहीली बार महिला मन पेवर ब्लॉक बनाए के बुता करत हे। अउ एकर अतका मांग हे की पूर्ति करे ह मुश्किल हो जाथ हे। आदर्श ग्राम गुड़ेलिया म नारी शक्ति ग्राम संगठन ले महिला मन पेवर ब्लॉक बनाए के बुता करत हे।
    ग्राम संगठन समूह के सदस्य संतोषी ध्रुव ह बताइस कि लगभग 1 महीना पहिली सुरू होए ए यूनिट ले अभी तक कुल 22 ट्रॉली 16500 वर्ग फीट पेवर ब्लॉक के निर्माण अउ सप्लाई हो गए हे। पेवर ब्लॉक के मांग जादा कर के तीर तीर के ग्राम पंचायत डहर ले होवत हे। जेमा ग्राम धनेली, खपराडीह, लेवई, कडार अउ भरतपुर हे। एकर संग ही लोगन मन घलो पेवर ब्लॉक के मांग करात हे। अभी तक हमार संगठन ल 2 लाख वर्ग फिट के एडवांस ऑर्डर मिल गय हे। जेकर विक्रय दर 52 लाख रुपिया हे। जेकर से लगभग 12 लाख रुपिया के शुद्ध लाभांश नारी शक्ति ग्राम संगठन के सदस्य मन ल मिलही। ओ अउ आघू बताइस कि एक वर्गफीट के 26 रुपिया दर निर्धारित करे गय हे। जेमा लगभग 20 रुपिया खरचा आथे अउ 6 रुपिया के बचत होथे। हमार इहां 2 प्रकार के पेवर ब्लॉक बनाए जाथ हे। जेमा कॉस्मिक अउ जिगजैग प्रकार हे। कॉस्मिक म 1000 नग म 555 फिट अउ जिगजैग 1000 नग म 357 फिट के पेवर ब्लॉक बन जाथे।
     सीमा ध्रुव कहत हे कि यूनिट के सुरू होए ले स्थानीय स्तर म ही हमन ल रोजगार अउ पर्याप्त मजदूरी के संग म पर्याप्त लाभांश राशि मिल जाथ हे। इसने समूह के एक अउ सदस्य मंजू ध्रुव कहत हे की रीपा के संचालन ले महिला समूह के जम्मो सदस्य अबड़ खुस हे अउ अतिरिक्त आय कमा के अपन जरूरत ल पूरा करे के संग संग परिवार के आर्थिक गतिविधि म घलो अपन हाथ बटात हे। ओमन ल काम के खोज म अब बाहिर जाए के जरूरत नई पड़त हे।
    इसने ग्राम गिर्रा के जय चंडी माँ महिला स्व सहायता समूह ह घलो पेवर ब्लॉक बनाए के बुता सुरू करे हे। उक्त यूनिट म 25 हजार नग पेवर ब्लॉक तियार हो गय हे गौरतलब हे कि राज्य शासन के महत्वाकांक्षी नरवा, गरूवा, घुरूवा अउ बारी योजना के अंतर्गत गांव म निर्मित करे गए गौठान के माध्यम ले अब गांव अउ महिला मन ल एक नवा पहिचान मिलत हे। गौठान म स्थापित रूरल इंडस्ट्रियल पार्क (रीपा) बनाए ले परिकल्पना अब साकार होवत हे ।
Success Stories
Neha Rathore