12वीं के पढ़ाई के संग युवा अपन मनमाफिक ट्रेड म करहीं आटीआई
रायपुर, 18 अगस्त 2023। छत्तीसगढ़ शासन कोति ले युवा मन ल हुनरमंद बनाए खतिर नित नवा उदीम करे जात हे। बेहतर शिक्षा के संग उंखर कौशल उन्नयन करे जात हे प्रदेश के युवा मन ल रोजगार ले घलोक जोड़े जात हे। प्रशासन ह युवा मन के ऊर्जा ल राजीव युवा मितान क्लब के माध्यम ले सकारात्मक दिशा देवत हे। युवा अपन लोक संस्कृति पारम्परिक खेल मन के प्रति आकर्षित हो सकयं ए खातिर छत्तीसगढ़िया ओलंपिक के शुरुआत करे गीस। युवा मन के आर्थिक बोझ कम करे बर प्रतियोगी परीक्षा पी .एस .सी. अऊ व्यापम के परीक्षा माफ कर देहे गए हे ताकि जादा ले जादा युवा अपन भविष्य संवार सकयं मुख्यमंत्री कौशल विकास योजना के माध्यम ले युवा मन ल रोजगार मिले हे।
छत्तीसगढ़ शासन ह सार्थक पहल करत युवा मन बर कक्षा 12 वीं के संग आई टी आई के सुविधा उपलब्ध करावत हे। राज्य के युवा मन ल बेहतर ले बेहतर शिक्षा के संग उंखर कौशल उन्नयन करके रोजगार ले जोड़ना प्राथमिकता मन म सामिल हे। मुख्यमंत्री कौशल विकास योजना के माध्यम ले साल 2018 ले लेके 30 जून 2023 के स्थिति म 43 हजार 862 युवा मन ल कौशल प्रशिक्षण देहे गए हे, जेमां ले 13 हजार 661 युवा मन ल रोजगार उपलब्ध होय हे अऊ 10 हजार 254 युवा मन ह स्व-रोजगार प्राप्त करे हें। अइसनहे प्रधानमंत्री कौशल विकास योजना के माध्यम ले 15 हजार प्रशिक्षित युवा मन म ले 3854 ल रोजगार मिले हे।
राज्य के बहुत झन विद्यार्थी, हायर सेकेंडरी तक शिक्षा प्राप्त करे के बाद कोनो निश्चित उद्देश्य नइ होए के सेती आगू के पढ़ाई छोड़ देथें अऊ ऊंखर तिर कोनो कौशल नइ होए अऊ उद्यमिता के कोनो ज्ञान नइ होए के सेती वो मन बेरोजगार बने रहिथें। स्कूल मन म देहे जात औपचारिक शिक्षा के संग राज्य के आईटीआई म देहे जात व्यवसायिक प्रशिक्षण के एकीकरण अऊ ओ मन ल मुख्यधारा म लाय के एक अभिनव शुरूआत करे गए हे। एखर तहत राज्य के हायर सेकेंडरी स्कूल मन म 11वीं कक्षा म पढ़त छात्र जेन संग म व्यावसायिक प्रशिक्षण घलोक प्राप्त करे के इच्छुक हें, ऊंखर बर स्कूल अउ आईटीआई समन्वय के माध्यम ले ओ मन ल दुनों मने स्कूली शिक्षा अउ अपन रुचि के व्यावसायिक प्रशिक्षण प्रदान करे के योजना चालू करे गए हे।
