रायपुर, 25 दिसंबर 2023। छत्तीसगढ़ सरकार ह मोदी के गारंटी के तीसरइया वादा सुशासन दिवस के मौका म पूरा कर देहे हे। मुख्यमंत्री श्री विष्णु देव साय ह आज अभनपुर के ग्राम बेन्द्री म आयोजित राज्य स्तरीय कार्यक्रम म प्रदेश के 12 लाख ले जादा किसान मन ल दू साल के धान के बकाया बोनस के रूप म 3716 करोड़ रूपिया के राशि ऊंखर बैंक खाता म हस्तांतरित करिन। उमन कार्यक्रम म कहिन कि किसान मन ले प्रति एकड़ 21 क्विंटल के मान ले धान बिसाबो। जरूरत परे म म समर्थन मूल्य म धान खरीदी के बेरा ल घलोक बढ़ाबो।
मुख्यमंत्री श्री साय ह कहिन कि मोदी के गारंटी के अंतर्गत हमन दू साल के बकाया बोनस के भुगतान के वादा करे रहेन अऊ एला आज अटल जी के जयंती सुशासन दिवसर म पूरा कर देन। हमर कथनी-करनी समान हे। प्रदेश ही नइ पूरा देश ह मोदी के गारंटी उपर भरोसा करत हे। उमन कहिन कि आज के दिन बहुत ऐतिहासिक हे। आज किसान मन के बैंक खाता म बोनस के राशि पहुंच गए हे। कई किसान मन ल तो दू लाख ले जादा के राशि मिले हे। किसान मन म बहुत खुश हें। हमन प्रदेश के जनता ले जऊन वादा करे हन ओ सबो वादा मन ल पूरा करबो।
मुख्यमंत्री ह कहिन कि हमन शपथ लेहे के अगलेच दिन कैबिनेट के बैठक म गरीब मन के 18 लाख आवास के निर्माण के मंजूरी देेन। एखर से वो मनखे मन ल घर मिल सकही जऊन पाछू पांच साल ले घर ले वंचित रहिन। पाछू पांच साल म कुछ मनखे मन ह पीएम आवास के एक किश्त मिले म मकान के काम तो शुरू करिन, फेर दुसर, तीसर किश्त नइ मिलीस तो कई झन बेघर हो गें, कोनो ह कर्ज लेके मकान बनवाइन। हमन अइसन बेघर मनखे मन के चिंता करे हन अऊ ओ मन ल घर देहे के निर्णय लेन।
मुख्यमंत्री ह कहिन कि मोदी के गारंटी के अंतर्गत जेन वादा हमन करे हन। सबो वादा पांच साल के अंतर्गत पूरा करबो। हमन वादा करे हन कि जेन विवाहित महिला हें ऊंखर खाता म हर महीना एक हजार रुपए महतारी वंदन योजना के अंतर्गत देबो। एखर खातिर घलोक हमन अनुपूरक बजट म प्रावधान कर देहे हन। उज्ज्वला योजना के अंतर्गत गैसकार्ड धारी परिवार मन ल पांच सौ रुपिया म सिलेंडर देहे के घलोक काम करबो। भूमिहीन कृषि मजदूर मन ल एक साल म दस हजार रुपिया देहे के काम करबो। कई विभाग मन के एक लाख खाली पद ल पूरा पारदर्शिता के संग भरबो।
मुख्यमंत्री ह कहिन कि हमन तेंदूपत्ता ल हरियर सोना कहिथन। हमर सरकार तेदूपत्ता संग्राहक मन ल 5500 रूपिया प्रति मानक बोरा के दर ले पारिश्रमिक के भुगतान करही। एखर संगेच संग्राहक मन बर चरण पादुका संग आन लाभकारी योजना मन ल सरलग जारी रखे जाही। मोला आप मन ल ये बतात खुशी होवत हे कि अब आप मन ल आयुष्मान कार्ड म 5 लाख रूपिया के जगा 10 लाख रूपिया तक के इलाज के सुविधा मिल सकही। अब बीमारी के इलाज बर करजा लेहे, खेत बेचे के जरूरत नइ होही। हम किसान मन ले धान 21 कुंटल प्रति एकड़ 3100 रुपिया प्रति कुंटल के मान ले बिसाबो। जरूरत परे म धान खरीदी के समय ल घलोक बढ़ाबो। ये मौका म उप मुख्यमंत्री श्री विजय शर्मा ह घलोक जनसमूह ल संबोधित करिन। उमन सुशासन दिवस के अवसर म अटल जी ल सुरता करत कहिन कि अटल जी के प्रधानमंत्री बनतेच गांव मन म घलोक सड़क पहुँचिस। किसान मन ल क्रेडिट कार्ड मिलना सुरू होइस। आज हमन सुशासन दिवस के अवसर म ही मोदी जी के गारंटी के जइसे दू साल के धान के बकाया बोनस देहे के निश्चय करेन।
