धमतरी, 27 दिसम्बर 2023। धमतरी विकासखण्ड के गौरव ग्राम कण्डेल निवासी श्रीमती पुष्पाबाई के जीवन अब पहिली ले अड़बड़ आसान हो गए हे, जउन देश के प्रधानमंत्री कोति ले गरीब मन बर शुरू करे गए प्रधानमंत्री आवास योजना के सेती हे। पुष्पाबाई ह बताइस कि वो अपन पति श्रवण कुमार के संग रोजी-मजदूरी करके अपन पुस्तैनी मकान, जेन माटी अऊ खपरा के छत वाला रहिस जेमे सामान्य जीवन व्यतीत करत रहिस। पुष्पा ह अपन मन म एक सपना संजोए रहिस, कि ओखरो एक पक्का मकान होवय, जेमां वो अपन परिवार के संग खुशहाल जीवन व्यतीत कर सकय। घर के कच्चा होए के सेती पहुना मन उहां रूकना पसंद नइ करत रहिन।
वोखर आर्थिक स्थिति ठीक नइ होए के सेती ओ ह पक्का घर के सपना ल पूरा नइ कर पात रहिस। तब ओ ल शासन के महत्वाकांक्षी प्रधानमंत्री आवास योजना ग्रामीण के संबंध म पता चलिस। जेमां कच्चा घर म रहइया गरीब, बेघर परिवार ल पक्का मकान देहे के सरकार कोति ले योजना चलाए जात हे। एला सुनके लगिस कि अब ओखर पक्का मकान म रहे के सपना साकार हो सकही। ये संबंध म पुष्पा ह बताइस कि जब मोर परिवार के ये योजना म नाम आइस तो मोला बहुत खुसी होइस। ये खुसी तब दुगुनी हो गे जब मोर नाम ले साल 2021-22 म प्रधानमंत्री आवास के स्वीकृति मिलीस। जेखर से मोर पक्का घर बने लगिस अऊ देखतेच देखते घर बनके पूरा हो गे, जेखर गृह प्रवेश कार्यक्रम घलोक रखे रहेन।
