मुख्यमंत्री श्री विष्णु देव साय ह श्रीराम मंदिर परिसर म स्वच्छता अभियान के तहत बहिरी लगा के करिन साफ-सफाई

रायपुर, 14 जनवरी 2024। मुख्यमंत्री श्री विष्णु देव साय ह इतवार के राजधानी रायपुर के वीआईपी रोड स्थित श्री राम मंदिर परिसर म स्वच्छता अभियान के तहत बहिरी लगाके साफ-सफाई करिन। मुख्यमंत्री ह मंदिर पहुंचके सबले पहिली प्रभु श्री राम के दर्शन करिन अऊ प्रदेश के सुख समृद्धि के कामना करिन। एखर बाद मुख्यमंत्री ह हाथ म बहिरी लेके मंदिर परिसर म सफाई करिन। जानबा हे कि प्रधानमंत्री श्री नरेंद्र मोदी के गिलौली म देश भर के मंदिर, तीर्थस्थान मन म स्वच्छता अभियान चलाए जात हे।
मुख्यमंत्री श्री विष्णुदेव साय ह मंदिर परिसर म स्वच्छता अभियान के बाद चर्चा करत कहिन कि प्रधानमंत्री श्री नरेंद्र मोदी के आव्हान म श्री राम मंदिर परिसर म हमन साफ-सफाई करे हन। मैं प्रदेश के नागरिक मन ले अपील करत हंव के ओ मन घलोक मंदिर अउ तीर्थस्थान मन म स्वच्छता अभियान चलावव। उमन कहिन कि 22 जनवरी के आयोध्या म श्री राम मंदिर के प्राण प्रतिष्ठा होही वो दिन पूरा दुनिया बर महापर्व होही। प्रभु श्री राम छत्तीसगढ़ के कण-कण अऊ जन-जन म बसे हे। छत्तीसगढ़ ओही कोसल हे जेकर बेटी, माता कौशल्या ह भगवान राम ल जन्म दीन। श्री राम ह दंडकारण्य ल अपन चरण रज ले पवित्र करिस। मॉ शबरी के बोइर के मिठास अभी तक छत्तीसगढ़ म घुले हे। हमार राज्य ले रामलला के भोग बर सुगंधित चावल, फल सब्जि आदि भेजे गे हे। राम भक्त के सेवा बर छत्तीसगढ़ के डॉक्टर के टीम घलोक आयोध्या गए हे। मुख्यमंत्री ह छत्तीसगढ़ वासी मन ले अपील करत कहिन कि 22 जनवरी के प्राण प्रतिष्ठा के अवसर म सबो मनखे अपन घर ल फूल ले सजावयं अऊ दीया जलावयं।
स्वच्छता अभियान के अवसर म धार्मिक न्यास अउ धर्मस्व मंत्री श्री बृजमोहन अग्रवाल, आदिम जाति विकास मंत्री श्री राम विचार नेताम, सांसद श्री सुनील सोनी, विधायक श्री पुरंदर मिश्रा, श्री अनुज शर्मा, गुरू खुशवंत साहेब अउर आन गणमान्य नागरिक उपस्थित रहिन।