गुरू घासीदास केन्द्रीय विश्वविद्यालय म उप मुख्यमंत्री के मुख्य आतिथ्य म संपन्न होइस कुलपति समागम के समापन समारोह
बिलासपुर, 19 जनवरी 2024। बिर घासीदास केन्द्रीय विश्वविद्यालय बिलासपुर म आज भारतीय विश्वविद्यालय संघ (मध्य क्षेत्र) के दू दिन के कुलपति समागम के समापन होइस। छत्तीसगढ़ के उप मुख्यमंत्री श्री अरुण साव समापन समारोह म मुख्य अतिथि के रूप म सामिल होइन। भारतीय विश्वविद्यालय संघ के अध्यक्ष प्रो. जी.डी. शर्मा ह समारोह के अध्यक्षता करिन। भारतीय विश्वविद्यालय संघ के महासचिव डॉ. (श्रीमती) पंकज मित्तल, बिर घासीदास विश्वविद्यालय के कुलपति प्रो. आलोक कुमार चक्रवाल अऊ कुलसचिव प्रो. मनीष श्रीवास्तव विशिष्ट अतिथि के रूप म समारोह म सामिल होइन।
कुलपति समागम के समापन समारोह ल मुख्य अतिथि के रूप म संबोधित करत उप मुख्यमंत्री श्री अरुण साव ह कहिन कि शिक्षा ल विश्वस्तरीय बनाए बर भारतीय विश्वविद्यालय संघ कोति ले करे जात काम सहराए के लइक हे। शिक्षा अउ संस्कृति के क्षेत्र म संघ के योगदान ले शिक्षा म एकरूपता अऊ समानता आवत हे। उमन कहिन कि लॉर्ड मैकाले के शिक्षा नीति ह हमर मानसिकता ल कमजोर करे हे। अब हम राष्ट्रीय शिक्षा नीति-2020 के मुताबिक विश्वविद्यालय मन म शिक्षा के व्यवस्था करना होगी। हम सबो जानत हन कि भारत म विश्वगुरु बने के क्षमता हे। पाछू कुछ बछर म पूरा दुनिया म भारत के मान-सम्मान अउ स्वीकार्यता बाढ़े हे। भारत ल देखे के दुनिया के नजरिया बदले हे। वो दिन दूर नइ हे, जब भारत फेर विश्व गुरू कहाही।
उप मुख्यमंत्री श्री अरुण साव ह समारोह म कहिन कि आज विद्यार्थी तनावग्रस्त अऊ अवसादग्रस्त होवत हें। बहुत अकन अप्रिय घटना होवत हे। ए मन ल रोके के जरूरत हे। एकर समाधान घलोक राष्ट्रीय शिक्षा नीति-2020 म हे। उमन छात्र मन ले आव्हान करीन कि ओ मन पढ़ाई ल तनाव के रूप म झन लेवयं। छात्र मन ल कक्षा म आत्मविश्वास अऊ ऊर्जा के माहौल मिलना चाही। पढ़ईया लईका मन ल राष्ट्रभक्त अउ आत्मविश्वास ले भरपूर नागरिक बनाए के जिम्मेदारी विश्वविद्यालय मन के हे। समारोह के शुभारंभ माँ सरस्वती अऊ गुरू घासीदास जी के पूजा-अर्चना अउ दीप प्रज्जवलन ले होइस। तरंग बैंड के छात्र-छात्रा मन ह सरस्वती वंदना अउ कुलगीत के प्रस्तुति दीन। मंचस्थ अतिथि मन के नान्हे पौधा मन ले स्वागत करे गीस।
