शहीद वीर नारायण सिंह श्रम अन्न योजना के तहत जिला के पहला कैंटीन के होइस शुभारंभ

जांजगीर-चांपा, 11 फरवरी 2024। जाजल्यदेव लोक महोत्सव अउ एग्रीटेक कृषि मेला 2024 के अवसर म वित्त मंत्री अऊ जांजगीर-चांपा जिला के प्रभारी मंत्री श्री ओ पी चौधरी ह काली शहीद वीर नारायण सिंह श्रम अन्न योजना के तहत जिला मुख्यालय जांजगीर के तीर के एफसीआई गोदाम तीर नवा बस स्टैंड परिसर म कैंटीन के शुभारंभ करिन। ए योजना के तहत आज प्रभारी मंत्री के संग जिला के पहला कैंटीन के शुभारंभ करे गीस। ए कैंटीन के माध्यम ले निर्माणी, संगठित अउ असंगठित वर्ग के श्रमिक मन ल मात्र 5 रु. म चावल, दाल, सब्जी, आचार या चटनी के संग गरम अऊ ताजा भोजन उपलब्‍ध कराए जाही।
मिले जानकारी मुताबिक ए योजना के क्रियान्वयन बर राज्य शासन (श्रम विभाग) अउ आर के एसोसिएट्स नई दिल्ली के बीच एमओयू हस्ताक्षर होए हे। जाँजगीर के ए कैंटीन म भिनसरहा 9 बजे ले मंझनिया 3 बजे तक गरम जेवन उपलब्‍ध कराए जाही अउ भोजन के समय श्रमिक मन के आधार म बदलाव करे जा सकय। ये मां खाए बर 400 ग्राम चावल, 100 ग्राम दाल, 100 ग्राम सब्ज़ी अउ 10 ग्राम आचार या चटनी अउ आरओ के पानी पीए बर उपलब्‍ध कराए जाही। ए योजन के तहत भोजन हफ्ता म 6 दिन कराया जाही अउ श्रमिक मन के जरूरत मुताबीक 7वां दिन घलोक उपलब्‍ध कराए जा सकत हे। एमओयू के मुताबिक एक थाली भोजन के राशि 52.65 रुपये निरधारित हे। जेमां 5 रु. श्रमिक ले अउ बाकी 47.65 रु. श्रम विभाग ह देवत हे। जानबा हे के शहीद वीर नारायण सिंह श्रम अन्न योजना साल 2017 ले छत्तीसगढ़ म चालू होके संचालित हे। ये योजना रायपुर, दुर्ग, रायगढ़, राजनांदगाँव, महासमुंद अउ अंबिकापुर म पहीली ले संचालित हे। श्रमिक कैंटीन के शुभारम्भ अवसर म कलेक्टर श्री आकाश छिकारा, जिला पंचायत मुख्य कार्यपालन अधिकारी श्री आर के खुटे, श्रम विभाग के श्री घनश्याम पाणिग्रही अउ विभाग के जम्‍मो अधिकारी कर्मचारी उपस्थित रहिन।