अंबिकापुर: महतारी वंदन योजना अंतर्गत फार्म भरे मन म उछाह के संग बड़ संख्या म पहुंचत हें महतारी

अंबिकापुर,13 फरवरी 2024। महतारी वंदन योजना के लाभ लेहे जिला के महिला मन मन उछाह हे, योजना बर ऑनलाइन आवेदन करे पहुंचत महिला मन के चेहरा म सुकून भरे मुस्कान हे। गांव-शहर म घर-घर ले महिला मन आंगनबाड़ी केंद्र, वार्ड कार्यालय मन म जाके ऑनलाइन फार्म भरे म जुटे हें, अतकेच नहीं महिला मन खुद अपन सगा-सहोदर, आस-पड़ोस के महिला मन ल घलोक योजना के लाभ लेहे जागरूक करत हें।
कलेक्टर श्री विलास भोस्कर के मार्गदर्शन म जिला म महतारी वंदन योजना के फार्म भरवाए बर सरलग शिवर घलोक आयोजित करे जात हे। जिला के महिला मन ए योजना के लाभ लेहे बर पाछू इतवार तक के स्थिति म 1 लाख 73 हजार 630 आवेदन जमा करे गए ।
जिला प्रशासन कोती ले हतारी जतन योजना के लाभ देवाए लगाए गए विर म पहुंचे वार्ड नंबर 27 भगत सिंह वार्ड के संगीता वर्मा बताइस कि प्रधानमंत्री श्री नरेन्द्र मोदी ह ये योजना शुरू करके हम महिला मन ल आर्थिक संबल देहे । फॉर्म भरे बर शिविर घलोक लगाए गए हे, अधिकारी-जनप्रतिधि अऊ आंगनबाड़ी कार्यकर्ता मन के पूरा संहयोग मिलत हे।
उहें महतारी वंदन योजना के फार्म भरे बर आंगनबाड़ी कार्यालय म पहुंचे ग्राम डिगमा के नरमनी बताइस कि आज वो बहुत खुश हे अऊ एकर कारण हे कि अब ओ ल योजना ले हर महीना एक हजार रुपीया मिलही। ओ ह कहिस के प्रधानमंत्री मोदी ह अपन गारन्टी पूरा करे हे। ए राशि ले ओ ल घर खर्च म सुविधा मिलही। उहें एक आन आवेदिका ह बताइस कि कुछ साल पहिली दुर्घटना म वोखर पति के आकस्मिक निधन हो गए रहिस, दू लइका मन के पालन-पोषण के जिम्मेदारी वोखर ऊपर हे। जइसे-तइसे अब काम करके ओखर जीवन चलत हे, अब प्रधानमंत्री मोदी के गारंटी ले हमला हर महिना 1000 रुपीया मिले ले सहूलियत होही।