छत्तीसगढ़ म सुशासन के नवा दौर

रायपुर, 17 फरवरी 2024। मुख्यमंत्री श्री विष्णु देव साय के अगुवई म छत्तीसगढ़ सरकार राज्य ल संवारे बर लउहे-लउहे फैसला लेवत हे। जनहित म लेहे जात ए फैसला मन ले राज्य के वनांचल क्षेत्र मन के संग पूरा प्रदेश म उत्साह के माहौल हे। राज्य म सुशासन के नवा दौर शुरू हो गए हे। मुख्यमंत्री श्री साय ह शपथ लेहे के केवल दू महिना के अंदर ही प्रधानमंत्री श्री नरेन्द्र मोदी कोति ले राज्य के जनता ल दे गए गारंटी ल पूरा करे बर दृढ़ संकल्पित होके बहुत अकन कदम उठाएं हे।
मुख्यमंत्री श्री साय ह अन्नदाता किसान मन ल दू साल के बकाया धान बोनस के राशि देहे के निर्णय लेत लगभग 13 लाख किसान के बैंक खाता मन म सुशासन दिवस के दिन 3716 करोड़ रूपिया के राशि अंतरित करीस। किसान मन ले 21 क्विंटल प्रति एकड़ अउ 3100 रूपिया प्रति क्विंटल के मान ले धान खरीदी करे गीस। किसान मन ल अभी हाल म समर्थन मूल्य के भुगतान सहकारी बैंक के माध्यम ले करे गए हे। किसान मन ल अंतर के राशि देहे बर राज्य सरकार कोति ले कृषक उन्नति योजना चालू करे जात हे, जेखर अंतर्गत वित्तीय साल 2024-25 के बजट म 10 हजार करोड़ रूपिया के प्रावधान अउ वित्तीय साल 2023-24 के तीसर अनुपूरक म 12 हजार करोड़ रूपिया के प्रावधान करे गए हे।
प्रदेश के साढ़े 12 लाख ले जादा ग्रामीण परिवार ल जल जीवन मिशन के तहत निःशुल्क नल कनेक्शन देहे के निर्णय लेहे गए हे। निःशुल्क नल कनेक्शन देहे बर राज्य के बजट म 4,500 करोड़ रूपिया के प्रावधान रखे गए हे। मुख्यमंत्री खाद्यान्न सुरक्षा योजना बर 3 हजार 400 करोड़ रूपिया के प्रावधान करे गए हे। अइसनहे दीनदयाल उपाध्याय भूमिहीन कृषि मजदूर योजना म भूमिहीन कृषि मजदूर मन ल 10 हजार रूपिया वार्षिक सहायता के निर्णय घलोक लेहे गए हे, एखर बर साल 2024-25 के बजट म 500 करोड़ रूपिया के प्रावधान करे गए हे।
मुख्यमंत्री श्री साय से शपथ ग्रहण के दूसरेच दिन पहिली कैबिनेट के बैठक म प्रधानमंत्री ग्रामीण आवास योजना के तहत 18 लाख घर के निर्माण के स्वीकृति देहे के निर्णय ले गीस, एखर बर साल 2023-24 के अनुपूरक बजट म 3799 करोड़ अऊ साल 2024-25 के बजट म 8,369 करोड़ रूपिया के प्रावधान करे गीस। महिला मन के सशक्तिकरण संग स्वास्थ्य अऊ पोषण ल ध्यान म रखत महतारी वंदन योजना शुरू करे गीस। ए योजना के तहत पात्र विवाहित महिला मन ल हर महीना एक हजार रूपिया के दर ले वार्षिक 12 हजार रूपिया आर्थिक सहायता दे जाही, एखर बर बजट म 3000 करोड़ रूपिया के प्रावधान करे गए हे।
मुख्यमंत्री श्री साय ह कहे हें कि युवा मन के भविष्य ले खिलवाड़ करइया मनखे ल छोड़े नइ जाए। ए संबंध म पीएससी परीक्षा घोटाला के सीबीआई जांच के निर्णय लेहे गए हे। उमन युवा स्वरोजगार ल बढ़ावा देहे बर छत्तीसगढ़ उद्यम क्रांति योजना लागू करे के निर्णय लेहे हें। अइसनहे पुलिस विभाग संग कई ठन शासकीय भर्ति मन म युवा मन ल निरधारित आयु सीमा म 5 बछर के छूट देहे के निर्णय घलोक लेहे गए हे।
मुख्यमंत्री श्री साय ह तेंदूपत्ता संग्रहण दर ल 4,000 रूपिया प्रति मानक बोरा ले बढ़ाके 5,500 रूपिया प्रति मानक बोरा करे के निर्णय लेहे हे। छत्तीसगढ़ म रेल नेटवर्क के विस्तार बर कटघोरा ले डोंगरगढ़ रेल लाइन निर्माण बर राज्य के बजट म 300 करोड़ रूपिया के प्रावधान करे गए हे। घरेलू उपभोक्ता मन ल 400 यूनिट तक आधा दाम म बिजली प्रदाय करे बर 1274 करोड़ रूपिया के प्रावधान करे गए हे। भ्रष्टाचार निवारण बर शासकीय योजना मन के क्रियान्वयन के निगरानी बर अटल मॉनिटरिंग पोर्टल शुरू करे गए हे। कोल परिवहन के पारदर्शी प्रक्रिया बर ऑनलाइन परमिट व्यवस्था लागू करे के निर्णय लेहे गए हे।
मुख्यमंत्री श्री साय ह छत्तीसगढ़ी संस्कृति के संरक्षण अउ संवर्धन बर छत्तीसगढ़ के ऐतिहासिक अऊ सांस्कृतिक महत्व के शहर राजिम के वैभव ल फेर स्थापित करे बर राजिम कुंभ (कल्प) आयोजन के निर्णय लेहे हे। छत्तीसगढ़ के मनखे मन ल अयोध्या यात्रा बर निःशुल्क रामलला दर्शन योजना लागू करे गए हे, एखर बर बजट म 35 करोड़ रूपिया के प्रावधान करे गए हे।