रायपुर, 27 फरवरी 2024। धर्मस्व अउ संस्कृति मंत्री श्री बृजमोहन अग्रवाल के पहल ले राजिम कुंभ के भव्यता 5 साल बाद फेर लहुटे हे। राजिम कुंभ कल्प 2024 मेला के आयोजन ए साल रामोत्सव के थीम उपर मनाए जात हे। राजिम कुंभ मेला स्थल म प्रभु श्री राम के जीवन चरित्र अऊ ऊंखर छत्तीसगढ़ वनवास अवधि उपर आधारित जीवंत झांकी के प्रदर्शन करे जात हे, जोकि मेला म पहुंचचइया जम्मो श्रद्धालु मन ल अपन कोति आकर्षित करत हे। मनखे धार्मिक सद्भाव अऊ मर्यादा पुरुषोत्तम श्री राम के आदर्श ल अनुभव करत ए झांकी आनंद उठावत हें।
जानबा हे कि मुख्यमंत्री श्री विष्णु देव साय के अगुवइ म अउ धर्मस्व अउ संस्कृति मंत्री श्री बृजमोहन अग्रवाल के मार्ग निर्देशन म ए पइत कुंभ मेला छत्तीसगढ़ शासन कोति ले श्रीराम ल समर्पित करे गए हे, इही तारतम्य म मेला के जम्मो सजावट म श्री राम के झलक स्पष्ट नजर आवत हे। शासन ह छत्तीसगढ़ म राम वन गमन आधारित चलित झांकी के प्रदर्शनी लगाए हे, जेमां वनवास के समय श्रीराम ह छत्तीसगढ़ के कई जगा म गए हें उहां के सचित्र चित्रण करे गए हे। जेमां लोमष ऋषि ले भेंट, त्रिवेणी संगम म बालू ले शिवलिंग के सीता ह जोन पूजा करिस तेन, माता कौशिल्या संग श्रृंगी ऋषि, शबरी अउ सुग्रीव ले भेंट के झांकी मनखे मन के बीच आकर्षण के केन्द्र बने हे। ए डोम म अवइया मनखे छत्तीसगढ़ के दण्डकारण्य क्षेत्र म राम ह जेन समें बिताए रहिस ते दिन के झांकी ल देख के मनखे रोमांचित होके आनंद उठावत हें।
रामोत्सव तर्ज म ही मुख्यमंच म आयोध्या म बने श्रीरामलला के मंदिर के प्रतिकात्मक चित्रण करे गए हे, जेखर से मुख्यमंच पूरा राममय दिखाई देवत हे। संगेच झांकी के प्रदर्शन म लेजर लाईट अऊ साउंड इफेक्ट के माध्यम ले छत्तीसगढ़ म श्रीराम के बिताए गए दिन ल देखाय जात हे, जेन अवइया पीढ़ी ल राम के चरित्र संग भगवान राम, लक्ष्मण अऊ माता सीता के छत्तीसगढ़ के दण्डकारण्य क्षेत्र के बिताए गए दिन ले परिचित करावत हे। ए झांकी ल देखइया श्रद्धालु मन ह बताइस कि हमला ए झांकी ले बनेच जानकारी प्राप्त होए हे, जेखर से हम अंजान रहेन। युवा मन ह बताइन कि जेन बात ल हमन किताब म पढ़े रहेन, ओला सचित्र देखके हम रोमांच ले भर उठेन। मेला आगंतुक राज्य शासन के ए पहल अड़बड़ सहरावत हें।
राजिम कुंभ कल्प 2024: श्रीराम के जीवन चरित्र अउ वनगमन रस्ता के झांकी बनीस आकर्षण के केन्द्र
