राज्यभाषा आयोग के तीन दिन के छत्तीसगढ़ी प्रशिक्षण कार्यक्रम

रायपुर, 28 फरवरी 2024। छत्तीसगढ़ राज्यभाषा आयोग कोति ले मंत्रालय महानदी भवन म तीन दिन के छत्तीसगढ़ी प्रशिक्षण कार्यक्रम 26 ले 28 फरवरी तक आयोजित करे जात हे। प्रशिक्षण के पहिली दिन लगभग 130 मंत्रालयीन कर्मचारी ह प्रशिक्षण के लाभ लीन। जेमां छत्तीसगढ़ के जाने माने साहित्यविद अऊ लेखक डॉक्टर चितरंजन कर ह अपन व्याख्यान दीन अऊ छत्तीसगढ़ी राजभाषा के प्रशासनिक उपयोग बर कर्मचारी मन ल प्रोत्साहित करिन। प्रशिक्षण के दूसर दिन लोक व्यवहार अऊ प्रशासनिक काम मन म छत्तीसगढ़ी के उपयोग अऊ शब्दावली मन के प्रशिक्षण दे गीस। आज के प्रशिक्षक शिक्षाविद डॉक्टर सुधीर शर्मा रहिस। प्रशिक्षण के आखरी दिन अनुभाग अधिकारी अऊ अवर सचिव स्तर के अधिकारी प्रशिक्षण प्राप्त करहीं। प्रशिक्षण कार्यक्रम म मंत्रालयीन कर्मचारी संघ के अध्यक्ष श्री महेन्द्र सिंह राजपूत के सहयोग रहिस।