महतारी वंदन योजना: चाय बेचके घर-परिवार चलइया कौशल्या दीदी के बिजनेस प्लान, योजना के पहली किस्त ले बढ़ाही अपन व्यवसाय

अम्बिकापुर, 07 मार्च 2024। महिला मन ल सशक्त अऊ आत्मनिर्भर बनाए बर छत्तीसगढ़ शासन ह महतारी वंदन योजना के प्रदेश भर म शुरुआत करे हे। जेखर लाभ लेहे महिला मन म गजब के उत्साह देखे जात हे। बड़ संख्या म नजदीकी आंगनबाड़ी म पहुंचके महिला मन ह आवेदन करिन अऊ अब एकर लाभ महिला मन ल मिलइया हे।
अंतरराष्ट्रीय महिला दिवस के अवसर म आयोजित महतारी वंदन सम्मेलन म प्रधानमंत्री श्री नरेंद्र मोदी अऊ मुख्यमंत्री श्री विष्णुदेव साय डीबीटी के माध्यम ले महिला मन के बैंक खाता म महतारी वंदन योजना के पहली किस्त ट्रांसफर करहीं। ए योजना के संग महिला मन आर्थिक रूप ले सशक्त बनहीं। ए योजना ल लेके महिला मन म बनेच उत्साह हे। चाय बेचके अपन अऊ अपन परिवार के भरण-पोषण करइया 65 बछर के कौशल्या सिंह सरकार के महत्वाकांक्षी योजना ल लेके अड़बड़ खुश नजर आईस। वो ह बताइस के वोखर घर म सात सदस्य हे। वोकर बताती प्रधानमंत्री आवास योजना ले ओखर खुद के अपन पक्का मकान बन गे। घर परिवार चलाय बर वो जिला कोर्ट तीर फुटपाथ म चाय स्टॉल लगाथे। जेखर से होवइया आमदनी ले घर-परिवार अऊ दुकान चलथे। पइसा के कमी ले वो अपन व्यवसाय नइ बढ़ा पावत रहिस। महतारी वंदन योजना के जब जानकारी मिलीस त उम्मीद के रोशनी वोला मिलीस। वो ह जल्दी फॉर्म भरके जमा करिस अऊ अब प्रधानमंत्री मोदी के गारंटी अऊ मुख्यमंत्री श्री साय के सुशासन म महतारी वंदन योजना ले मिलइया पइसा के उपयोग वो अपन चाय स्टॉल ल आगू बढ़ाए म करही जेखर से चार पइसा के आमदनी बाढ़ही अऊ घर परिवार के पालन-पोषण बने सहिन हो पाही। ओखर कहना हे कि छत्तीसगढ़ सरकार जरूरतमंद गरीब महिला मन ल आर्थिक सहायता देवत हे जेखर से हम जइसे महिला मन अपन रोजमर्रा के जरूरत ल पूरा कर पाहीं। श्रीमती कौशल्या सिंह ह महतारी वंदन योजना बर प्रधानमंत्री अउ मुख्यमंत्री के तहेदिल ले धन्यवाद देहे हे।