शहरी क्षेत्र मन म मतदान प्रतिशत बढ़ाय बर मतदाता मन ल करव जागरूक: श्रीमती रीना बाबासाहेब कंगाले

मुख्य निर्वाचन पदाधिकारी श्रीमती कंगाले ह बाइक रैली अउ स्वीप एक्सप्रेस ल देखईस हरियर झण्डी
मतदाता जागरूकता के संदेश देहे खातिर सैकड़ों मनखे होइन बाइक रैली म सामिल
रायपुर 10 अपरेल 2024। लोकसभा निर्वाचन-2024 अंतर्गत मुख्य निर्वाचन पदाधिकारी श्रीमती रीना बाबासाहेब कंगाले ह मतदाता मन ल अपन मताधिकार के परयोग करे बर जागरूक करे खातिर रायपुर जिला म आज आयोजित बाइक रैली अउ स्वीप एक्सप्रेस ल हरीयर झण्डी देखाके रवाना करिस। उमन कहिन कि मतदान तारीक के सबो मतदाता अपन घर ले बाहिर निकलके मतदान केंद्र पहुंचके अपन मताधिकार के अवश्य उपयोग करव।
मुख्य निर्वाचन पदाधिकारी श्रीमती रीना बाबा साहेब कंगाले ह कहिन कि शहरी क्षेत्र म मतदान के प्रतिशत पहिली ले बेहतर करना हमार बर एक चुनौती हे अऊ ए काम ल सफल करे म हमला जादा प्रयास करे के जरूरत हे। उमन कहिन कि हम सबो मनखे मन ल जागरूक करे के संग खुद घलोक ए बात के निश्चय करव कि हम अपन मताधिकार के परयोग अवश्य करबो।
मुख्य निर्वाचन पदाधिकारी श्रीमती कंगाले ह कहिन कि रायपुर जिला प्रशासन ह बाइक रैली के माध्यम ले मतदाता मन ल जादा ले जादा मतदान करे के जेन अपील करे जात हे, वो सराहनीय हे। उमन विधानसभा निर्वाचन के समय रायपुर उत्तर विधानसभा क्षेत्र म सबो मतदान केन्द्र मन म महिला कर्मी मन ह शांतिपूर्ण मतदान संपन्न कराए रहिन तेकर सराहना करत विश्वास जताइन कि आगामी चुनाव के समय घलोक महिला कर्मी बढ़-चढ़ के निर्वाचन काम ल संपन्न कराहीं। कलेक्टर अउ जिला निर्वाचन अधिकारी डॉ. गौरव सिंह ह ए बेरा म कहिन कि स्वीप रैली के आयोजन करे के उद्देश्य मतदाता मन ल मतदान बर प्रेरित करना हे। ए अवसर म श्रीमती कंगाले ह उपस्थित मतदाता मन ल मतदान करे के शपथ देवाए गीस।
बाइक रैली कलेक्ट्रेट परिसर ले आकाशवाणी चौक होत व्हाइट हाउस, श्याम टॉकीज, लिली चौक, जुन्ना बस्ती विवेकानन्द आश्रम, एनआईटी कैम्पस, नालन्दा परिसर म खतम होइस। श्रीमती कंगाले खुदे हेलमेट पहिने ई-स्कूटर आई क्यूब म सवार रहिन, जेमां चुनाव के पर्व, देश के पर्व के तख्ती लगे रहिस। कलेक्टर डॉ. गौरव सिंह हेलमेट पहिरे बुलेट म सवार रहिन ऊंखर पीछू नगर निगम आयुक्त श्री अविनाश मिश्रा बइठे रहिन। नालंदा परिसर म रैली खतम होए के बाद आयोजित संक्षिप्त कार्यक्रम म एआईजी श्री संजय शर्मा अऊ उंखर टीम के संग मतदाता जागरूकता उपर आधारित जुंबा प्रस्तुत करे गीस। संगेच तेजराम साहू ह लोक नृत्य प्रस्तुत करत मतदाता मन ले वोट डारे के अपील करिन। ए बेरा म जुम्बा अउ लोक कलापथक दल के कलाकार मन ल स्‍वामी विवेकानंद के विचार उपर आधारित पुस्तक भेंट करे गीस।
स्वीप एक्सप्रेस के चारो कोति मतदाता जागरूकता ले जुड़े पोस्टर अऊ फोटोग्राफ्स लगे रहिस, ये मां लोक कलाकार सवार रहिन। बाइक रैली म अधिकारी-कर्मचारी सामिल होइन जेन मतदाता जागरूकता ले जुड़े तख्ति लेहे रहिन। एमां हमर जिम्मेदारी, मतदान करेंगे बारी-बारी, आगे-आगे लोकतंत्र के तिहार, वोट देवव बनव जिम्मेदार, दाई, भाई, दीदी जम्मो संगवारी, मतदान करना हमर जिम्मेवारी आदि नारा लिखे रहिस। रैली म महिला अऊ पुरूष छत्तीसगढ़ी वेश-भूषा धारण करे रहिन।
जानबा हे कि लोकसभा निर्वाचन 2024 अंतर्गत प्रदेश म तीन चरण म मतदान होही। तीसर चरण अंतर्गत रायपुर लोकसभा क्षेत्र बर मतदान तारीक 7 मई हे।