दुर्ग 18 मई 2024/ लोकसभा निर्वाचन 2024 अंतर्गत संसदीय क्षेत्र नंबर 07 दुर्ग म 07 मई म शांति पूर्वक मतदान संपन्न होइ। ए बात बर निर्वाचन काम ले जुड़े अधिकारी/कर्मचारी मन ल ऊंखर उत्कृष्ठ काम मन बर प्रशस्ति पत्र भेंटकरके सम्मानित करे गीस। जटार क्लब दुर्ग म जिला प्रशासन कोति ले आयोजित एक ठी सादा सम्मान समारोह म संभागायुक्त श्री एस. एन. राठौर, कलेक्टर अउ जिला निर्वाचन अधिकारी सुश्री ऋचा प्रकाश चौधरी अऊ एस.पी. श्री जितेन्द्र शुक्ला घलोक सामिल होइन। समारोह ल संबोधित करत संभागायुक्त श्री एस. एन. राठौर ह अपन संक्षिप्त उद्बोधन म कहिन कि लोकसभा क्षेत्र दुर्ग म निर्विवाद अउ शांति पूर्ण मतदान पूरा कराए म अधिकारी मन के महत्वपूर्ण भूमिका रहे हे। उमन बेहतर समन्वय के संग मतदान प्रक्रिया पूरा कराए बर सबो ल बधाई अउ शुभकामना दीन। कलेक्टर सुश्री ऋचा प्रकाश चौधरी ह कहिन कि चुनाव प्रक्रिया के समय कई ठन काम मन बर अधिकारी मन ल अलग-अलग दायित्व सौंपे गए रहिस। अधिकारी मन ह सौंपे गए दायित्व मन के निर्वहन बेहतर ढंग ले करिन, ते पाए के कोनो प्रकार के दिक्कते नइ आईस। कलेक्टर ह अधिकारी मन ले अपेक्षा करे हें कि बेहतर कार्यशैली के संग मतगणना काम ल घलोक निर्विवाद पूरा कराए म सबो अपन अहम भूमिका निभावयं। समारोह म संभागायुक्त श्री राठौर, कलेक्टर सुश्री चौधरी अउर एस.पी. श्री शुक्ला ह अपन हाथ ले अधिकारी मन ल प्रशस्ति पत्र भेंट करके सम्मानित करिन। ए बेरा म जिला प्रशासन अउ पुलिस प्रशासन के अधिकारी सपरिवार मौजूद रहिन।
चुनाव म सुग्घर काम करईया साहेब मन के मान करे गीस
