छत्तीसगढ़ के लइका मन म लुकाय प्रतिभा अऊ हुनर म आवत हे निखार
रायपुर, 19 मई 2024। छत्तीसगढ़ के स्कूल मन म कहूं भीथिया म त कहूं किताब मन म नान्हे हाथ ले फोटू बनावत दिखत ये लइका मन त कोनो गावत कोनो डांस करत अऊ कोनो अभिनय करत दिखत हें। पाना मन ले कलाकारी, साग मन ले चित्रकारी, रंगीन चावल के कला, माटी ले खिलौना निर्माण, धागा ले डिजाइन बनाना अऊ मुखौटा निर्माण जइसे रोचक गतिविधि म लइका मन बूड़े हें। अलग-अलग भाव के संग लइका मन के चेहरा म विजय मुस्कान दिखत हे।
ये नजारा हे छत्तीसगढ़ राज्य के स्कूल मन के। गर्मी के छुट्टी म स्कूल शिक्षा विभाग ह समर कैंप के आयोजन करत हे। विभाग के सचिव श्री सिद्धार्थ कोमल सिंह परदेशी ह लइका मन म रचनात्मकता बर सकारात्मक अउ नवाचारी पहल करे हे। बस्तर, दुर्ग, रायपुर, बिलासपुर अउ सरगुजा संभाग तक लइका खुशनुमा माहौल म खेल-खेल म बुनियादी साक्षरता अउ संख्या ज्ञान सीखे कोति कदम बढ़ावत हें। राष्ट्रीय शिक्षा नीति 2020 के सिफारिश ल छत्तीसगढ़ के स्कूल मन के माध्यम ले बालक-पालक अउ शिक्षक मन तक पहुंचाए के ये अनूठा तरीका हे।
राज्य म ग्रीष्मकालीन अवकाश म समर कैंप के आयोजन भिनसरहा 7 ले 9.30 बजे तक आयोजित करे जात हे। ये कैंप स्वैच्छिक हे। लइका मन बर ये बहुत अच्छा कार्यक्रम हे। सबो लइका मन म कुछ न कुछ प्रतिभा होथे। लइका मन के प्रतिभा ल प्रोत्साहित करे ले ओखर परिणाम घलोक बेहतर होथे। स्कूल शिक्षा विभाग के कुशल मार्गदर्शन म लोक शिक्षण संचालक श्रीमती दिव्या उमेश मिश्रा के संयोजन म राष्ट्रीय शिक्षा नीति के जल्दी क्रियान्वयन बर संभाग अउ जिला के अधिकारी मन ल प्रशासनिक अउ वित्तीय प्रशिक्षण घलोक प्रशासन अकादमी के माध्यम ले प्रदान करे जात हे।
