छत्तीसगढ़ के महिला मन ल मिलही गांव म रोजगार: साय सरकार बनाही गांव मन म महतारी सदन

पहिली चरण म हर ब्लॉक के 10 गांव मन म होही सदन
रायपुर, 30 मई 2024। छत्तीसगढ़ म भारतीय जनता पार्टी के सरकार बने के बाद महिला मन कोती विशेष ध्यान देहे जात हे। पहिली महतारी वंदन योजना ले महिलाओं के खाता म 1 हजार रुपिया हर महिना डारे के काम सरकार ह करिस अब गांव मन म महतारी सदन बनाके महिला मन ल स्वावलंबी बनाए के काम सरकार करइया हे।
पहिली चरण म प्रदेश के 146 ब्लॉक म 10 महतारी सदन बनाए जाही। विभाग पहिली 1460 सदन बनाए के काम करइया हे। पांच साल म सरकार सबो ग्राम पंचायत मन म सामुदायिक भवन बनाही। विभाग ह महतारी सदन के ड्राइंग डिजाइन घलोक तय कर लेहे हे। दरअसल, बजट म महतारी सदन बनाए के घोषणा करे गए रहिस। एखर बर 50 करोड़ रुपिया बजट म आबंटित करे हे। पंचायत अउ ग्रामीण विकास मंत्री विजय शर्मा के मानना हे कि प्रदेश के हर ग्राम पंचायत म एला बनाय जाना चाही। ऊंखर निर्देश म गांव मन म जगा खोजे जात हे।
ये महतारी सदन लगभग 120 वर्ग मीटर म बनही। एखर बर सबो जिला पंचायत के अध्यक्ष अऊ सदस्य मन ले भवन के संबंध म प्रस्ताव घलोक मंगाए जात हे। राज्य सरकार चाहत हे कि महिला मन ल गांवे म काम करे के जगा देहे जाय। काबर कि महिला मन बर समूह म या व्यक्तिगत तौर म काम करे के जगा नइ हे। इही ल ध्यान म रखके महतारी सदन बनाय जात हे। महतारी सदन बनाए बर प्रदेश के बड़का पंचायत मन ल प्राथमिकता दे जाही। एखर बाद छोटे पंचायत मन के नंबर आही।
जानबा हे के 3000 ले जादा आबादी वाले ग्राम पंचायत या गांव अऊ जमीन देवइया पंचायत मन ल प्राथमिकता देहे ऊपर विचार करे गीस जात हे। प्रदेश म लगभग 11 हजार पंचायत हे। ये मां 3 हजार ले जादा जनसंख्या वाले लगभग 696 पंचायत हे। 5 हजार ले जादा जनसंख्या वाले 96 ग्राम पंचायत हे। अइसनहे 4 हजार ले 5 हजार जनसंख्या वाले 159 अऊ तीन हजार ले 4 हजार के जनसंख्या वाले 441 ग्राम पंचायत हे।
महतारी सदन बर फंड ल लेके पीएमजीएसवाय के मुख्य अभियंता कृष्ण कुमार कटारे ह बताइस कि सदन बनाए बर प्रदेश सरकार कंवर्जेंस ले राशि जुटाही। मनरेगा अऊ 15वां वित्त के पईसा के घलोक उपयोग करे जाही। सबो जिला पंचायत के अध्यक्ष अऊ सदस्य मन ले भवन के संबंध म प्रस्ताव मंगाए जात हे।