मुख्यमंत्री श्री साय ह पंडरिया क्षेत्र बर पांच निःशुल्क एम्बुलेंस ल हरी झंडी देखाके रवाना करिन

रायपुर 20 जून 2024। मुख्यमंत्री श्री विष्णु देव साय ह काली राजधानी स्थित मुख्यमंत्री निवास परिसर ले पंडरिया विधानसभा क्षेत्र वासी मन बर 5 निःशुल्क एम्बुलेंस ल हरी झंडी देखा के रवाना करिन। भावना समाज सेवी संस्थान कोति संचालित निःशुल्क एम्बुलेंस के संख्या बढ़के अब आठ हो गए हे। क्षेत्र के जरूरतमंद मरीज मन ल अब आपातकालीन सुविधा 24 घंटा 7 दिन मिलही। ए अवसर म कैबिनेट मंत्री श्री बृजमोहन अग्रवाल, श्री रामविचार नेताम, श्री केदार कश्यप अऊ विधायक श्री पुरन्दर मिश्रा घलोक उपस्थित रहिन।
मुख्यमंत्री श्री साय ह कहिन कि आज मोला बहुते खुसी अनुभव होवत हे। विधायक श्रीमती भावना बोहरा के पहल ले अपन एक अऊ वादा ल पूरा करे के हमला अवसर मिले हे। निःशुल्क एम्बुलेंस सेवा ले पंडरिया विधानसभा क्षेत्र के अंतर्गत इंदौरी, पंडरिया, पांडातराई, दुल्लापुर अउ कुंडा क्षेत्र म बेहतर स्वास्थ्य सुविधा अउ आपातकालीन सेवा मिलही। भावना समाज सेवी संस्थान से निःशुल्क एम्बुलेंस सेवा के संचालन करे जाही।
मुख्यमंत्री श्री साय ह कहिन कि एखर से कोनो विषम हालत म मरीज ल जल्दी सेवा मिलही। जनहित के अइसन प्रयास बर स्‍वयं सेवी संस्था मन ल आगू आना चाही। विधानसभा चुनाव के समय “भावना बोहरा के गारंटी“ सेवा संकल्प पत्र म हमन स्वस्थ अउ समृद्ध पंडरिया के उद्देश्य ल सार्थक करे बर पंडरिया विधानसभा म निशुल्क एम्बुलेंस सेवा शुरू करे के संकल्प करे रहेन अऊ आज मोला बहुतेच ख़ुशी होवत हे कि आप मन के सहयोग अउ समर्थन ले हम अपन ए संकल्प ल पूरा करे के उदीम करत हन।
जानबा हे कि रणवीरपुर अउ आदिवासी अउ वनांचल क्षेत्र कुई-कुकदुर म पहिली ले ही तीन निःशुल्क एम्बुलेंस सेवा के सुचारू रूप ले संचालन होवत हे अऊ अब तक हजारों परिवार ल ए आपातकालीन सेवा के लाभ मिलत हे। आपातकालीन समय म मरीज मन ल घर ले अस्पताल अउ अस्पताल ले घर लाए-ले जाय के संग मरीज मन ल बेहतर उपचार बर रायपुर अउ आन जिला मन म घलोक ए एम्बुलेंस के माध्यम ले अस्पताल पहुँचाए के सुविधा मिले हे। एखर संगेच पहिली संचालित एक निःशुल्क मोबाइल हेल्थ पैथ लैब अउ महाविद्यालयीन छात्रा मन बर महाविद्यालय ले घर आए-जाए बर तीन निःशुल्क बस सेवा के सुविधा देहे जात हे।