रायपुर, 24 जून 2024/ मुख्यमंत्री श्री विष्णुदेव साय ह राज्य के लाखों मितानिन बहिनी मन ल एक बड़का सौगात देहे के बात कहे हें। मुख्यमंत्री श्री साय ह कहिन के प्रदेश के स्वास्थ्य व्यवस्था ल दुरूस्त रखे म मितानिन बहिनी मन के बहुत बड़ योगदान हे। अइसन म उंखर खयाल रखना राज्य के कर्तव्य हे। मुख्यमंत्री श्री विष्णुदेव साय के पहल म अब राज्य के मितानिन बहिनी मन ल महतारी वंदन योजना के तर्ज म हर महिना उंखर मानदेय बैंक खाता म मिले लगही। मुख्यमंत्री ह एखर बर स्वास्थ्य मंत्री ल दिशा निर्देश घलोक जारी कर देहे हें।
स्वास्थ्य मंत्री श्री श्याम बिहारी जायसवाल ह मुख्यमंत्री के निर्देश म ए बात के घोषणा करत कहिन कि बहुत जल्दी मितानिन बहिनी मन ल आनलाइन बैंक खाता म भुगतान मिले लगही। श्री जायसवाल ह कहिन कि एखर शुरूआत मुख्यमंत्री श्री साय के हाथ ले होही। उमन कहिन कि प्रदेश के मुखिया श्री विष्णुदेव साय छत्तीसगढ़ ल स्वस्थ छत्तीसगढ़ बनाए के संकल्पना म काम करत हे अऊ एखर बर प्रदेश के स्वास्थ्य सुविधा मन म सरलग सुधार आवत हे जेन निरंतर जारी रहिही।
