सरिया म बनही हायर सेकेण्डरी स्कूल के नवा भवन : वित्त मंत्री श्री ओ.पी. चौधरी

सारंगढ़-बिलाईग, 28 जून 2024। वित्त मंत्री श्री ओ.पी. चौधरी ह सारंगढ़-बिलाईगढ़ जिला के सरिया म बिरसपत के संझा हायर सेकेण्डरी शाला के नवा भवन के निर्माण काम के भूमिपूजन करिन। ये भवन करीब 1 करोड़ 19 लाख रुपिया के लागत ले बनही। ए मौका म पूर्व विधायक डॉ. जवाहर नायक, श्री जगन्नाथ पाणिग्राही, नगर पंचायत अध्यक्ष श्री स्वप्निल स्वर्णकार संग बड़ संख्या म गणमान्य नागरिक उपस्थित रहिन।

ए  बेरा म वित्त मंत्री श्री चौधरी ह निर्माण एजेंसी अउ ठेकेदार ल स्पष्ट शब्द म कहिन कि शाला भवन निर्माण म कोनो प्रकार के गड़बड़ी नइ होना चाही। भवन निर्माण गुणवत्ता म समझौता नइ करे जा सकय। स्कूल ही वो मंदिर हे जिहां लइका के भविष्य के निर्माण होथे। भूमि पूजन के बाद वित्त मंत्री श्री ओ.पी. चौधरी ह स्कूल परिसर म आयोजित जनसभा ल संबोधित करिन। उमन कहिन कि 6 महीना के अंदर नवा शाला भवन के निर्माण पूरा हो जाही। ठेकेदार समय सीमा म काम करके देंही। फरवरी तक नवा शाला भवन म हायर सेकेंडरी स्कूल के क्लास लगही। ए बेरा म हायर सेकेंडरी स्कूल सरिया के प्रभारी प्राचार्य श्री तिर्की ह वित्त मंत्री ले नवीन शाला भवन म चार अकतहा कक्ष के मांग करिन। जेकर वित्त मंत्री ह तुरंते घोषणा कर दीन।