सफलता के कहानी
जरूरतमंद मन ल तुरंते पहुंचाए जात हे अस्पताल
बिलासपुर, 29 जून 2024। मुख्यमंत्री श्री विष्णुदेव साय के मार्गदर्शन अऊ स्वास्थ्य मंत्री श्री श्याम बिहारी जायसवाल के निर्देश म राज्य म स्वास्थ्य सुविधा मन ल बढ़ाय बर सरलग काम करे जात हे। इही कड़ी म बिलासपुर जिला के कोटा ब्लॉक के सुदूर पहुंचविहीन गांव मन म जिला प्रशासन कोति ले शुरू करे गए बाईक एम्बुलेंस गांव वाले मन बर वरदान साबित होवत हे। कलेक्टर श्री अवनीश शरण के विशेष पहल म कोटा ब्लॉक के गांव मन तक स्वास्थ्य सुविधा मन म विस्तार लाय बाईक एम्बुलेंस संगवारी एक्सप्रेस के सुविधा शुरू करे गए हे। अभी हाल म 4 बाईक एम्बुलेंस के संग जरूरतमंद मन ल अस्पताल तक पहुंचाए जात हे। ये सुविधा चौबीसों घंटा गांव वाले मन ल मिलत हे।
कोटा ब्लॉक के एक बड़का भाग म विषम भौगोलिक परिस्थति के चलते सड़क मार्ग ले पहुंच पाना संभव नइ होवय। गांव वाले मन ल आपातकाल स्थिति म घर ले अस्पताल आए-जाए बर बाईक एम्बुलेंस निःशुल्क परिवहन के एक अच्छा माध्यम बन गए हे। संगवारी एक्सप्रेस बाईक म बनाय गए एक मिनी एंबुलेंस के जइसे हे, जेमां एक मरीज ल बिना असुविधा के अस्पताल तक पहुंचाए जा सकत हे। राज्य शासन कोति ले जन स्वास्थ्य बर चलाए जात आन एम्बुलेंस के जइसे ये घलोक एक बिलकुल निःशुल्क सुविधा हे। कोटा ब्लॉक के सुदूर वनांचल मन म रहइया गर्भवती महिला मन संग आन मनखे मन बर बाईक एम्बुलेंस वरदान साबित होवत हे।
