दिव्यांगजन मन ल लाभान्वित करे खातिर अधिकारी खुदे करव पहल- कलेक्टर सुश्री नम्रता गांधी
धमतरी 02 जुलाई 2024। जिला के आमजन मन के समस्या, मांग, शिकायत मन के जल्दी निराकरण बर कलेक्टर सुश्री नम्रता गांधी सरलग उदीम करत आवत हें। अइसनहेच एक आवेदन धमतरी विकासखण्ड के ग्राम रांवा के शत्-प्रतिशत दृष्टिबाधित दिव्यांग श्रीमती हेमबाई साहू ह बीते दिन जनदर्शन म देहे रहिस। ए म कलेक्टर सुश्री गांधी ह आवेदिका ल तुरंते स्मार्ट सफेद छड़ी देहे के निर्देश समाज कल्याण विभाग ल दीन। समाज कल्याण विभाग ह तुरते स्मार्ट सफेद छड़ी के बिवस्था करिस अउ कलेक्टर ह आवेदिका ल अपन हाथ ले सफेद छड़ी दीन। ए बेरा म कलेक्टर ह उपस्थित अधिकारी मन ले कहिन कि उहू मन स्वयं दिव्यांगजन ल लाभान्वित करे खातिर पहल करव।
