गरियाबंद, 02 जुलाई 2024। मुख्यमंत्री श्री विष्णु देव साय के सरकार ह आर्थिक रूप ले कमजोर अऊ दिव्यांग मनखे मन ल तुरंते सहायता देवत हे। उंखर संवेदनशीलता ले मौका म ही दिव्यांगजन मन ल राशनकार्ड, व्हीलचेयर अउ शासन के योजना मन के लाभ देहे जात हे। फरियाद लेके अवइया दिव्यांग संतेाषी ल तुरंते सहायता मिले म ओखर आंखी म खुशी छलक उठीस। एखर बर वो ह मुख्यमंत्री ल धन्यवाद दीस।
ए कड़ी म गरियाबंद जिला के नगर पंचायत कोपरा निवासी कुमारी संतोषी साहू जेन ह जनम ले ही अस्थि बाधित दिव्यांग हे। वो ह प्रशासन ल अपन समस्या बतात कहे रहिस के आधार कार्ड बनाए बर आधार सेंटर जाथंव त मोर बौनापन के सेती आधार कार्ड बनाए बर करे गए रजिस्ट्रेशन घेरी-बेरी रिजेक्ट हो जात हे। जेकर सेती आधार कार्ड नइ बन पात हे। वोखर अभिभावक मन जिला कार्यालय पहुंचके कलेक्टर ल अपन समस्या बताईन। कलेक्टर ह संतोषी साहू के समस्या ल तुरंते संज्ञान मे लेके संबंधित विभाग ल जल्दी कार्यवाही करे के निर्देश देहे रहिन।
अधिकारी मन ह उंखर समस्या ल देखत संतोषी बर आधार कार्ड के संगें-संग मेडिकल प्रमाण पत्र, यूडीआईडी कार्ड, राशन कार्ड, निःशुल्क बस यात्रा पास अउ आए-जाए बर व्हीलचेयर तको दीन। अब वो शासन कोति ले संचालित कई ठन योजना मन के लाभ उठा पाही, राशन दुकान ले अब ओ ल हर महिना राशन सामान मिलही। वो अपन जरूरी काम व्हीलचेयर के माध्यम ले कोनो जगा जाके कर सकही। जिला प्रशासन ह वोखर बर निःशुल्क बस यात्री पास बनाके घलोक देहे हे। ताकि वो यात्रा कर सकय। संतोषी छत्तीसगढ़ शासन के बहुत अगन योजना मन के लाभ पाके गदगद हो गए हे।
