महासमुंद, कांकेर, सरगुजा अऊ राजनांदगांव जिला म एक हजार 991 स्कूल मन के जीर्णोद्धार काम पूरा
रायपुर, 04 जुलाई 2024। शहर मन के संगें-संग गांव के स्कूल घलोक अब आकर्षक बनत जात हे। नवा शिक्षा सत्र शुरू होए के संग नौनिहाल मन ल बेहतर शैक्षणिक परिवेश देवाए खातिर स्कूल मन के कायाकल्प करे जात हे। महासमुंद, कांकेर, सरगुजा अऊ राजनांदगांव जिला म एक हजार 991 स्कूल के जीर्णोद्धार काम पूरा हो चुके हे।
जानबा हे कि मुख्यमंत्री श्री विष्णु देव साय ह हाले म शिक्षा विभाग के समीक्षा बैठक के समय सबो कलेक्टर मन ल अपन जिला मन म स्कूल मन के मरम्मत अऊ जीर्णोद्धार के काम जल्दी पूरा कराए के निर्देश देहे रहिन। ऊंखर निर्देश के बाद सबो जिला मन म स्कूल के मरम्मत अऊ जीर्णोद्धार के काम म तेजी आए हे। स्कूल मन ल आकर्षक ढंग ले घलोक सजाए जात हे।
मुख्यमंत्री स्कूल जतन योजना के अंतर्गत करे जात जीर्णोद्धार म प्राथमिक, पूर्व माध्यमिक, हाई स्कूल अऊ हायर सेकेण्डरी स्कूल मन म पक्की छत, कक्षा मन म टाईल्स अऊ शाला परिसर म पेवर ब्लॉक के संग रंगरोगन के काम करे जात हे। ए स्कूल मन म ज्ञानवर्धक अऊ कलात्मक चित्रकारी घलोक करे जात हे। स्कूल मन म आवश्यकतानुसार अकतहा कक्ष आदि बनाए जात हे।
नवा शिक्षा सत्र चालू होए के संगेच स्कूल मन म शाला प्रवेश उत्सव घलोक मनाए जात हे। शाला मन म मरम्मत अऊ जीर्णोद्धार होए ले छात्र अउ पालक मन के रूझान घलोक ए विद्यालय मन के प्रति बाढ़े हे। विद्यालय मन के कायाकल्प करे अउ आकर्षक बनाए के सेती पालक अपन लइका मन ल स्कूल म दाखिला करावत हें। मुख्यमंत्री स्कूल जतन योजना के अंतर्गत महासमुंद जिला म स्कूल मन म जीर्णोद्धार के 333, सरगुजा म 1104, राजनांदगांव म 280, कांकेर म 374 काम पूरा कर लेहे गए हे।
