रायपुर, 05 जुलाई 2024। बगिया म राज्य स्तरीय शाला प्रवेशोत्सव म पहुंचे मुख्यमंत्री श्री विष्णुदेव साय आज शिक्षक के भूमिका म दिखिन। ओ मन बगिया मिडिल स्कूल के लइका मन के बीच क्लास म पहुंचिन। पढ़ाई लिखाई के बात के बीच उमन संस्कृत के श्लोक- ‘‘काक चेष्टा बको ध्यानं, श्वान निद्रा तथैव च। अल्पहारी गृह त्यागी, विद्यार्थी पंचलक्षणं‘‘ के माध्यम ले बताइन के एक आदर्श विद्यार्थी म पांच गुण जरूर होना चाही। एक छात्र ल कौंवा के जइसे कभी हार नइ मानना अऊ लक्ष्य ल पाय बर प्रयास करते रहना चाही। सारस के जइसे अपन लक्ष्य के प्रति एकाग्रचित्त होके काम करना चाही। श्वान के जइसे जरूरत के नींद लेव अऊ सतर्क रहव। संतुलित आहार लेवव अऊ अपन आराम ल छोड़के अऊ कंफर्ट जोन ले बाहिर निकलके चुनौती मन के सामना करे के क्षमता बिकसित करव।
मुख्यमंत्री श्री साय ह लइका मन ल बताइन कि ओ मन घलोक बगिया के इही स्कूल ले पढ़े हे। तब इहां प्राइमरी तक के कक्षा लगत रहस। छत खपरैल के रहिस अऊ हम जमीन म बइठ के पढ़त रहेन। हफ्ता म एक दिन सबो लइका अपन अपन घर ले गोबर लाके इहां के लिपाई करत रहिन। अब तो स्कूल पक्का बन गे हे। इहां कुर्सी टेबल घलोक लग गे हे। शिक्षक घलोक बहुत हे। आप मन सबो मन लगाके पढ़व। खूब मेहनत करव, अपन समय के सदुपयोग करव अऊ ऊंचा मुकाम हासिल करव।
