राजस्व मंत्री श्री टंकराम वर्मा नवा बने अकतहा कुरिया के करिन लोकार्पण
स्कूल म अहाता निर्माण, प्रार्थना शेड संग प्रयोगशाला बर 30 लाख रूपिया के मंजूरी
रायपुर, 07 जुलाई 2024। वन विभाग अऊ भारत स्काउट अउ गाइड क़े संघरा उदीम म इतवार के स्वामी आत्मानन्द उत्कृष्ट विद्यालय अर्जुनी, जिला बलौदाबाजार-भाटापारा म आयोजित वन महोत्सव म राजस्व मंत्री श्री टंकराम वर्मा मुख्य अतिथि क़े रूप म सामिल होइन। श्री वर्मा ह विद्यालय परिवार के मनखे मन ल पेड़ लगाय अउ बचाय खातिर किरिा खवाईन अउ एक पेड़ माँ क़े नाम अभियान क़े तहत शाला परिसर म मौलश्री के पौधा रोपित करिन। एखरे संग 30.13 लाख रूपिया के लागत ले नवा बने अकतहा कुरिया के लोकार्पण तको करिन अऊ स्कूल म अहाता निर्माण अउ प्रार्थना शेड बर 10 -10 लाख, पम्प बर 2 लाख, प्रयोगशाला अउ शौचालय निर्माण बर 8 लाख रूपिया देहे के घोषणा करिन।
राजस्व मंत्री श्री वर्मा ह कहिन के प्रधानमंत्री श्री नरेंद्र मोदी ह एक पेड़ माँ क़े नाम म लगाय के सन्देश देहे हे। प्रधानमंत्री जी क़े सन्देश ल जन -जन तक पहुँचाए अऊ पर्यवारण के रक्षा क़े खातिर सबो मनखे अपन माँ क़े नाम म माँ क़े संग पेड़ लगावव। कहूं माँ नइ हे त ओखर सुरता म पेड़ लगावव। उमन कहिन के पेड़ लगाना आसान हे, फेर ओखर संरक्षण अउ देखभाल करत ओला बड़ा करना कठिन हे। हमला कठिनाई के सामना करत पेड़ ल बचाना हे। जल, जंगल अऊ जमीन सलामत रइही, तभे हमला प्राण वायु मिलही। उमन कहिन के छत्तीसगढ़ ल शांति अऊ समृद्धि क़े रद्दा म ले जाय खातिर प्रधानमंत्री श्री नरेन्द्र मोदी अउ मुख्यमंत्री श्री विष्णुदेव साय क़े सन्देश के अनुपालन करना होही। उमन भारत स्काउट अउ गाइड क़े काम मन के सराहना करत कहिन के सामजिक सद्भाव क़े संग पर्यवारण बचाय क़े काम म घलोक बढ़ चढ़के हिस्सा लेवव।
ए बेरा म नगर पालिका अध्यक्ष श्री चित्तावर जायसवाल, जनपद अध्यक्ष श्रीमती सुमन योगेश वर्मा, उपाध्यक्ष श्री ईशान वैष्णव, सरपंच श्री प्रमोद जैन, पूर्व नगर पालिका अध्यक्ष श्री अशोक जैन, नरेश केशरवानी संग स्थानीय जनप्रतिनिधि संग भारत स्काउट अउ गाइड क़े पदाधिकारी, शिक्षक, स्कूली लइका अउ ग्रामीणजन उपस्थित रहिन।
