बीमारी मन ल देखते डॉक्टर मन अऊ स्वास्थ्य कर्मी मन ल मुख्यालय नइ छोड़े के हुकुम
स्कूल मन म प्रार्थना के बाद लइका मन ल डायरिया अउ मलेरिया के बारे म जागरूक करे जाए
कलेक्टर ह बाईक ले करिस मलेरिया प्रभावित गांव मन के दौरा
मलेरिया चौपाल लगाके मितानिन मन ले खुद अपन कराईन मलेरिया जांच
बिलासपुर, 19 जुलाई 2024/ बारिश के मौसम म बीमारी मन के प्रकोप रहिथे। एला देखत मुख्यमंत्री श्री विष्णुदेव साय ह कहे हें के स्वास्थ्य के मामला म कोनो लापरवाही नइ होनी चाही। श्री साय ह सबो अधिकारी मन ल संवेदनशील गांव मन के दउरा करके हालत उपर नजर रखे अऊ जरूरी कदम उठाए के हुकुम देहे हें।
इही कड़ी म बिलासपुर जिला के कलेक्टर श्री अवनीश शरण ह कोटा विकासखण्ड के मलेरिया प्रभावित कुरदर, छुईहा, टेंगनमाड़ा संग बहुत अकन गांव मन के दौरा करिन। कलेक्टर ह बरसा के सेती चिखला अउ लद्दी वाले छुईहा अउ चिखलाडबरी मार्ग म बाईक म सवार होके निरीक्षण करिन अऊ गांव के पहुंच मार्ग ल तुरंत दुरुस्त करे के हुकुम घलोक दीन। कलेक्टर ह कुरदर म मलेरिया चौपाल लगाके उहां के हालात के समीक्षा करिन। उमन गांव के चौक म मलेरिया चौपाल लगाके खुद मितानिन ले मलेरिया जांच कराईन।
ए बेरा म कलेक्टर ह गांव वाले मन अऊ स्वास्थ्य विभाग के मैदानी कर्मचारी मन ले हालात के जानकारी लीन। कुरदर के सरपंच श्री राजकुमार पैकरा ले घलोक चर्चा करिन। उमन स्वास्थ्य अमला ल रोज संझा के जनचौपाल लगाके मनखे मन म जागरूकता फैलाय ल कहिन। उमन एक बाईक एम्बुलैंस ल कुरदर म चौबीसों घण्टा रखे के हुकुम दीन। सबो चिकित्सक अउ स्वास्थ्य कर्मचारी मन ल मुख्यालय म रहे ल कहिन। कैंदा अस्पताल ल एक 108 वाहन उपलब्ध कराए अउ कुरदर म पानी अउ बिजली के समस्या के निदान करे के हुकुम संबंधित अधिकारी मन ल दीन।
उमन टेंगनमाड़ा प्राथमिक स्वास्थ्य केन्द्र के घलोक निरीक्षण करिन। उमन हुकुम दीन के कहूं फेल्सिफेरम मलेरिया कन्फर्म होत हे त स्थानीय स्तर म इलाज न करके सीधा जिला अस्पताल या सिम्स म भर्ती बर रिफर करे जाये। उमन कहिन के स्कूल मन म प्रार्थना के बाद लइका मन ल डायरिया अउ मलेरिया ले बचे के उपाय बताव। कलेक्टर ह हुकुम दीन के एक अलग कर्मचारी के ड्यूटी लगाके मरीज मन के घर के फोन नम्बर लेके सरलग बीमारी के मॉनीटरिंग करे जाए।
