महासमुंद, महासमुन्द के गुरूघासी दास वार्ड के निवासी ममता अनंत अपन पति ले अलग रह के जीवन बसर करथे, अपन जीवन ल फेर से संवारे बर वो ह संघर्षरत रहिस। वोला काम तो आत रहिस फेर आर्थिक सहायता के अभाव म ओ ह खुद के ब्यूटी पार्लर शुरू नइ कर पात रहिस। बढ़त ब्याज दर के सेती बैंक ले करजा लेना वोकर बर संभव नइ रहिस। अइसन म, आंगनबाड़ी कार्यकर्ता श्रीमती कोमिन झुलपे ह ओ ल ‘सक्षम योजना’ के बारे म जानकारी दीस। तब वो ह योजना के तहत आवेदन करिस अऊ ओ ल सक्षम योजना के तहत सिरिफ 3 प्रतिशत सादा ब्याज दर म कुल एक लाख बीस हजार रुपिया के करजा देहे गीस। करजा पास होतेच ममता ह अपन 19 बछर के बेटी के संग मिलके ब्यूटी पार्लर के काम शुरू कर दीस। ए योजना ह न केवल ममता ल भलुक वोखर बेटी ल घलोक आर्थिक रूप ले आत्मनिर्भर बना दीस।
ममता अऊ वोखर बेटी ह सरलग मेहनत करके काम ल बढ़ात हें अऊ अब उंखर मासिक आमदनी लगभग 15,000 रुपिया तक हो गए हे। ए आमदनी ले ममता न केवल अपन जीवन के गुजारा आराम ले करत हे, भलुक अपन बेटी बर रोजगार के नवा रद्दा घलोक बना देहे हे। ममता ह बताइस के वो ह सक्षम योजना के तहत करजा लेहे रहिस, ओखर सरलग किस्त जमा करत हे अऊ अपन परिवार के खरचा घलोक बने सहिन उठावत हे। ये योजना आर्थिक परेशानी ले घिरे महिला मन ल आर्थिक रूप ले सशक्त करे के संग अपन पांव म खड़े होए के मौका घलोक प्रदान करत हे। ममता ह ए योजना के संचालन बर शासन ल धन्यवाद देहे हे।
