वॉर्ड नंबर 31 म कई ठन विकास काम मन के वाणिज्य उद्योग अऊ श्रम मंत्री श्री लखन लाल देवांगन ह करिन भूमिपूजन
कोरबा, 30 जुलाई 2024। विष्णु देव सरकार म विकास काम मन के रफ्तार अब गति पकड़ लेहे हे। चुनाव म जेन वार्ड म मनखे मन ह वॉर्ड के समस्या ले अवगत कराए रहिन, अब वो काम मन ल स्वीकृति प्रदान करके जल्दी चालू करे जात हे। मनखे मन ल अब कोनो विकास काम मन बर जादा अगोरा नइ करना परय। ये बात वाणिज्य उद्योग अऊ श्रम मंत्री श्री लखन लाल देवांगन ह कोरबा नगर निगम के वॉर्ड नंबर 31 म कई ठन विकास काम मन के भूमिपूजन के समय कहीन।
मंत्री श्री देवांगन ह कहिन कि दादरखुर्द वार्ड के कई अइसन मोहल्ला हे जिहां विकास काम आज तक नइ होए हे। 10 साल ले वॉर्ड के सड़क, नाली अऊ स्ट्रीट लाइट नइ लग सके हे। विधानसभा चुनाव के समय वॉर्ड वासी मन ह ए काम मन के मांग करे रहिन। चुनाव के बाद कोरबा निगम क्षेत्र के सबो वार्ड के अइसन काम मन बर विष्णुदेव सरकार ह तुरंते राशि मंजूर करे हें। जिला खनिज मद 2024-25 ले कुल 146.69 लाख के लागत ले दादर मेन रोड ले प्रधानमंत्री आवास परिसर तक सीसी रोड, नाली, अऊ स्ट्रीट लाइट के काम कराए जाही। मंत्री श्री देवांगन ह कहिन कि देश के यशस्वी प्रधानमंत्री ह जिला खनिज मद के राशि के अधिकार हमला देहे हें। अब श्री विष्णु देव साय के सरकार म जनता के विकास काम मन बर राशि स्वीकृत करे जात हे। ए अवसर म जिला उपाध्यक्ष प्रफुल्ल तिवारी, वॉर्ड नंबर 16 के पार्षद नरेंद्र देवांगन, वॉर्ड नंबर 31 के पार्षद सुकुंदी यादव, पार्षद धनश्री साहू, पार्षद रितु चौरसिया, ईश्वर साहू, चन्दन साहू जी समेत आन उपस्थित रहिन।
