राज्यपाल श्री डेका ह पूर्व प्रधानमंत्री श्री बाजपेयी के पुण्यतिथि म दीन श्रद्धांजलि
रायपुर, 16 अगस्त 2024। प्रधानमंत्री भारत रत्न स्वर्गीय श्री अटल बिहारी बाजपेयी के पुण्यतिथि म आज राज्यपाल श्री रमेन डेका ह ओ मन ल भावभीनी श्रद्धांजलि अर्पित करिन। उमन कहिन कि श्री बाजपेयी विराट व्यक्तित्व, महान वक्ता, जननायक होए के संगे-संग अजातशत्रु रहिन जिनकर सबो दल के मनखे बराबर सम्मान करत रहिन।
ए बेरा म राज्यपाल श्री डेका ह श्री बाजपेयी ले जुड़े सुरता मन ल साझा करिन अऊ कहिन कि ओ मन छोटे-बड़े सबो कार्यकर्ता मन के ध्यान रखत रहिन अऊ सम्मान करत रहिन। श्री डेका ह 1978-79 म ऊंखर असम दौरा के संबंध म सुरता ल गोहराईन।
राज्यपाल श्री डेका ह भारत ल विश्व पटल म स्थापित करे बर श्री बाजपेयी के योगदान के उल्लेख करते कहिन के विदेश अउ अंतर्राष्ट्रीय मंच म भारत के मजबूती ले पक्ष रखके उमन देश के मान बढ़ाए हें। भारत ल जब कमजोर देश समझे जात रहिस, तब पोखरण म परमाणु परीक्षण करके उमन भारत ल परमाणु शक्ति संपूर्ण देश घोषित कर दीन। ए कदम ले उमन भारत ल विश्व म एक सुदृढ़ वैश्विक शक्ति के रूप म स्थापित कर दीन। राज्यपाल ह श्री वाजपेयी के प्रधानमंत्री के कार्यकाल ल अभूतपूर्व बताइन।
ए बेरा म राज्यपाल के सचिव श्री यशवंत कुमार, विधिक सलाहकार श्री भीष्म प्रसाद पाण्डेय, अउ राजभवन के आन अधिकारी मन अउ कर्मचारी मन ह घलोक पुष्पाजंलि अर्पित करिन।
