रायपुर, 16 अगस्त 2024। मुख्यमंत्री श्री विष्णु देव साय ह आज इहां अपन निवास म पूर्व प्रधानमंत्री भारत रत्न श्रद्धेय स्वर्गीय श्री अटल बिहारी वाजपेयी के पुण्यतिथि के अवसर म ऊंखर छायाचित्र म माल्यार्पण करके ओ मन ल नमन करिन। ए मौका म डॉ. रामप्रताप सिंह घलोक मौजूद रहिन।
मुख्यमंत्री श्री साय ह ए बेरा म कहिन कि श्रद्धेय स्वर्गीय श्री अटल जी हमार राज्य बनइया यें। छत्तीसगढ़वासी मन ले उंखर विशेष लगाव रहिस। उमन ए भौगोलिक क्षेत्र ल नवा राज्य के रूप म आकर देके प्रदेशवासी मन के भावना के सम्मान करे रहिन। ओ मन बहुमुखी प्रतिभा के धनी रहिन। पत्रकार, कवि अऊ राजनेता के रूप म उमन अपन अलग पहिचान बनाय रहिन।
भारत के प्रधानमंत्री के रूप म हो या विदेश मंत्री के रूप म उमन वैश्विक स्तर म भारत के प्रतिनिधित्व करत अमिट छाप छोड़े हें। ऊंखर प्रधानमंत्री रहत देश म कइ अइसे योजना लागू करे गीस, जेन ह ग्रामीण भारत के तस्वीर बदल दीस। श्रद्धेय स्वर्गीय श्री अटल जी भारत के हर एक नागरिक के सुरता म हे।
श्री साय ह कहिन कि ओ मन अइसन राजनेता रहिन, जे मन दलगत राजनीति ले ऊपर उठके सबो के स्नेह मिलीस। अटल जी मां भारती के यश अऊ प्रतिष्ठा बर आजीवन समर्पित रहिन। मुख्यमंत्री ह कहिन कि स्वर्गीय श्रद्धेय अटल जी के संग मोर कतकोन सुरता के गोठ हे, जेन मोला हमेशा प्रेरित करथे। श्री साय ह कहिन कि अटल जी युगपुरुष रहिन, उमन सुशासन के मंत्र दीन अऊ आज हम उही रद्दा म आगू बढ़त छत्तीसगढ़ के विकास सुनिश्चित करत हन।
