ग्राम पंचायत लाई कठौतिया, हरचौका, चैनपुर अउ परसगढ़ी के स्वच्छाग्रहि दुवारी-दुवारी कचरा सकेल के बदलत हें गांव के हाल
एमसीबी/22 अगस्त 2024। कलेक्टर डी. राहुल वेंकट के निर्देशन म अउ परियोजना निदेशक नितेश उपाध्याय के मार्गदर्शन म अब गांव के गली अऊ घर ले निकलइया सूखा कचरा ल स्वच्छाग्रही मन ह साप्ताहिक दुवारी-दुवारी कचरा सकेल के सेग्रिकेशन सेड म ले जाके पृथक्करण करत हें।
स्वच्छ होवत हे चौक चौराहा
नियमित साप्ताहिक अपशिष्ट संग्रहण ले घर के कचरा अब सड़क म नइ फेके जात हे। जेखर से गांव के गली अऊ चौक चौराहा पहिली ले स्वच्छ नजर आए लगे हे जेखर मुख्य कारण गांव वाले मन के बदलत व्यवहार हे अऊ स्वच्छाग्रही मन के श्रम हे।
अतिरिक्त आय के सृजन
घुरवा अब आय के घलोक स्रोत बनत हे। सेग्रिकेशन सेड म सकलाए कचरा ह अब अकतहा आय के जरिया बन गए हे। स्वच्छाग्रही मन के सकेले प्लास्टिक लोहा, टीना, कागज़ के गत्ता ल कबाड़ी वाले ल बेंच के अकतहा आय होवत हे। संगेच यूजर चार्ज अऊ ग्राम पंचायत के संग स्वच्छता शुल्क के रूप म मासिक पारिश्रमिक प्रदाय तको करे जात हे।
बीमारी म आईस कमी
ग्राम पंचायत म गांव वाले मन के बीच जागरूकता बर स्वच्छता रैली, स्वच्छता गोठ के संग स्वयं जागरूक होए ले घरेलू गंदा पानी के उचित प्रबंधन, किचिन गार्डन या सोखता गड्ढा बनाके करे जात हे। घर आंगन के आसपास अपशिष्ट जमा झन होवय अउ स्वच्छ हाथ ले भोजन बनाए अउ ग्रहण करे जात हे। स्वच्छ पानी के उपयोग करे जात हे जेखर से वर्षा ऋतु म होवइया जल जनित बीमारी मन म घलोक कमी आए हे।
