अपन सउंख पूरा करे खातिर करत हें बचत, घर के जरूरत घलोक होवत हे पूरा
कोरबा, 23 अगस्त 2024। छत्तीसगढ़ सरकार के महतारी वंदन योजना कई महिला मन के सपना पूरा करत हे। ये योजना बचत के संग महिला मन अऊ ऊंखर परिवार के सुग्घर भविष्य के रद्दा खोलत हे। योजना के तहत हर महीना मिलइया पइसा ले बहुत अकन महिला मन अपन कईयोन बछर के सउंख पूरा करत हे। गरीबी के सेती अपन छोटे-छोटे सउंख अऊ सपना ले समझौता करे ल मजबूर महिला मन ल महतारी वंदन योजना ह बड़का संबल देहे हे। प्रदेश के लाखों महिला मन जइसे ए ह कोरबा के वंदना राठिया के घलोक दिली ख्वाहिश पूरा करे हे।
कोरबा जिला के विकासखण्ड कोरबा के कोरकोमा गांव के वंदना राठिया के बेटा के पैदा होए के समय ले ही बड़ इच्छा रहिस कि अपन बेटा के गला म छोट कन ही सही सोना के एक लॉकेट पहिरावय। फेर घर के खराब माली हालत के सेती वो अपन इच्छा पूरा नइ कर पात रहिस। ओ ह बचत कर कुछ रुपिया जरूर जोड़े रहिस, फेर वो लॉकेट खरीदे बर नाकाफी रहिस। छत्तीसगढ़ सरकार ह जब ए साल मार्च म महतारी वंदन योजना चालू करिस त मानो वंदना के किस्मत खुल गे। योजना के शुरूआत ले ही ओला हर महीना एक हजार रुपिया मिलत हे। छै महीना म वंदना ह अतका रकम जोड़ लेहे हे के आखिरकार ओखर सपना पूरा होए के दिन आ गे। वो गांव के साप्ताहिक बाजार गीस अऊ सुनार ले लॉकेट बनवाके अपन बेटा के गला म पहना लीस। ये ओखर करीब चार साल जुन्ना सपना के पूरा होए के दिन रहिस। वंदना के चेहरा म खुशी अऊ गहरा संतोष देखतेच बनत रहिस।
वंदना राठिया कहिथे के महतारी वंदन योजना ले हर महिना मिलत राशि हमार बहुत काम के हे। हम जइसे महिला मन बर एक हजार रुपिया बड़का राशि हे। पति के कमाई ले घर के खर्च ही चल पाथे। छोटे-छोटे जरूरत बर महतारी वंदन योजना ले मिले राशि काम आथे। वो कोसिस करथे के हर महीना ये मां ले कुछ बच जाय। थोड़ा-थोड़ा करके ठीक-ठाक रकम जमा होही त वो अपन दूसर सपना पूरा करे के काम आही।
