भृत्य हीरालाल ह रेडक्रॉस सोसायटी ल दीस 6 लाख रूपिया दान
जिला के सबले प्रेरणादायी मनखे हे हीरालाल…कलेक्टर
एमसीबी, 24 अगस्त 2024। आज संयुक्त जिला कार्यालय के सभाकक्ष म रेडक्रॉस सोसायटी के सम्मान समारोह के आयोजन करे गीस। कार्यक्रम म रेडक्रॉस के पदाधिकारी श्री एम. के. राउत, मुख्य कार्यपालन अधिकारी जनरल सेक्रेटरी श्री अशोक कुमार अग्रवाल, जिला शाखा अध्यक्ष कलेक्टर डी. राहुल वेंकट, मुख्य चिकित्सा अउ स्वास्थ्य अधिकारी डॉ. अविनाश खरे, जिला शाखा नोडल श्री सौमेन्द्र मंडल उपस्थित रहिन। ए बेरा म भृत्य हीरालाल ल वोखर असाधारण सेवा अऊ समर्पण बर सम्मानित करे गीस। हीरालाल ह नगर पालिका मनेन्द्रगढ़ से 15 दिसंबर 2023 के अपन स्वेच्छा ले सेवानिवृत्ति लीस अउ 5 लाख 75 हजार रूपिया रेडक्रास सोसायटी मनेन्द्रगढ़ ल अनुदान दे दीस। संगेच 25 हजार रूपिया दे के रेडक्रास के स्थायी सदस्यता प्राप्त तको करिस।
हीरालाल ह अपन स्वेच्छा ले रेडक्रास सोसायटी मनेन्द्रगढ़ ल प्रदान करिस। जेमां पीडित मनखे ल मदद करे जा सकय। जिला के रेडक्रास म उपलब्ध राशि के उपयोग प्रकृतिक आपदा, गंभीर बीमारी के मरीज मन के मदद करे बर होही। रेडक्रास के हर जिला म अध्यक्ष कलेक्टर होथे। हीरालाल जइसे एक सामान्य मनखे ह अतका बड़ राशि रेडक्रस ल प्रदान करिस। एकर बर जिला एम.सी.बी. रेडक्रास के पूरा टीम ओ ल कोटि-कोटि धन्यवाद करिस। ये अनुदान ले पूरा जिला अउ प्रदेश म एक संदेश जरूर जाना चाही जेखर से प्रेरित होके जन सामान्य रेडक्रस सोसायटी म अपन सहयोग देके पीड़ित मानवता के सेवा म भागीदार बन सकय।
ए मौका म रेडक्रॉस के जिला शाखा सचिव डॉ. अविनाश ह हीरालाल के प्रशंसा करत कहिन के ओखर सेवा भाव अऊ निष्ठा समाज बर एक अनुकरणीय उदाहरण हे। समारोह म कई गणमान्य मनखे ह भाग लीस अऊ हीरालाल ल वोखर योगदान बर बधाई दीन।
