बलरामपुर-रामानुजगंज, 27 अगस्त 2024। जिला के विकासखण्ड शंकरगढ़ के ग्राम लरंगी के प्रगतिशील कृषक श्री अमलू तीर 02 एकड़ खेत हे अऊ एकर पारिवारिक पेशा खेती-बाड़ी हे। श्री अमलू परम्परागत् तरीका ले खेती करत रहिस, जेमे कई ठन प्राकृतिक आपदा आत रहिस अउ उन्नत तकनीकी ज्ञान के अभाव म उत्पादन अतका कम होत रहिस के परिवार के खर्च चलाना मुश्किल हो जात रहिस। एखर अलावा भविष्य के पारिवारिक जिम्मेदारी घलोक अंधकारमय देखाई देत रहिस।
अमलू अपन आय ल बढ़ाए खातिर एक दिन विकासखण्ड के उद्यानिकी विभाग गीस अउ अधिकारी मन ले सम्पर्क करके खेती के उन्नत तकनीक के बारे म चर्चा करिस।वोला पता चलिस के विकासखण्ड म संचालित राष्ट्रीय बागवानी मिशन योजनांतर्गत प्रशिक्षण अउ भ्रमण कार्यक्रम के आयोजन होवइया हे। ए प्रशिक्षण कार्यक्रम म भाग लेके अमलू ह सब्जी उत्पादन के संगे-संग अंतरवर्ती फसल लेहे के निर्णय लीस। वो ह उद्यान विभाग ले मिरचा बीजहा ले के अपन 02 एकड़ खेत म मिरचा के खेती करिस, जेखर बर 80 हजार रूपिया खर्च करना परिस। संगेच उद्यान विभाग ह ओ ल मिरचा के खेती करे बर 20 हजार रुपिया के अनुदान घलोक दीस।
अमलू बताथे के मिरचा के खेती करे ले मोर आय के स्त्रोत म बढ़ोत्तरी होए म मोर आर्थिक स्थिति म सुधार आवत हे। अमलू के ए जुनून ल देखत आस-पास के कृषक घलोक उद्यानिकी फसल ल अपनाए बर प्रेरित होवत हें।
अमलू के मेहनत अऊ उद्यानिकी विभाग के मदद ले मिरचा के बम्पर फसल होवत हे जेखर से किसान अमलू के चेहरा के मुस्कान अऊ आय स्त्रोत म बढ़ोत्तरी होए हे। वो ह बताइस के खेती ले लगभग 100 क्विंटल मिरचा मिले हे जेखर बाजार मूल्य 02 लाख 30 हजार रूपिया हे। खर्च काटके अमलू ल लगभग 01 लाख 50 हजार रूपिया के बचत होए हे।
