रायपुर, 28 अगस्त 2024। मुख्यमंत्री श्री विष्णु देव साय आज उड़ीसा के सुंदरगढ़ जिला के ग्राम केंदुडीही पहुंचके उहां केंद्रीय जनजातीय कार्य मंत्री श्री जुएल उरांव के धर्मपत्नी स्वर्गीय श्रीमती झिंगिया उरांव के श्रद्धांजलि कार्यक्रम म सामिल होइन। उमन स्वर्गीय श्रीमती झिंगिया उरांव के फोटू म पुष्प अर्पित करके ओ मन ल श्रद्धांजलि अर्पित करिन। मुख्यमंत्री श्री साय ह श्री जुएल उरांव अऊ ऊंखर परिजन ले मिलके शोक संवेदना प्रकट करिन।
मुख्यमंत्री श्री विष्णु देव साय ह ए बेरा म कहिन कि स्वर्गीय श्री अटल बिहारी वाजपेई जब साल 1999 म प्रधानमंत्री बनिन त उमन पहली पइत आदिम जाति कल्याण मंत्रालय के गठन करे रहिन। ए मंत्रालय के पहिली मंत्री श्री जुएल उरांव बने रहिन। उमन श्री उरांव के संग अपन घनिष्ठ संबंध के सुरता करत कहिन के श्री जुएल उरांव ऊंखर बड़े भाई जइसे हें। मुख्यमंत्री श्री साय जब सांसद रहिन, तब श्री उरांव ह ऊंखर संसदीय क्षेत्र म बहुत अकन विकास काम मन बर राशि देहे रहिन।
मुख्यमंत्री ह श्रीमती झिंगिया उरांव ल श्रद्धांजलि अर्पित करत कहिन के कोनो मनखे के सफलता के पीछू उंखर धर्मपत्नी के बड़का योगदान होथे। बीते बछर म हमार भाई जुएल उरांव जी ह जनहित म जऊन काम करे हे, ओमां हमेशा भाभी जी सहभागी रहे हें।
ए अवसर म छत्तीसगढ़ के कृषि अउ आदिम जाति कल्याण मंत्री श्री रामविचार नेताम, पूर्व मंत्री सुश्री लता उसेंडी घलोक मुख्यमंत्री के संग रहिन।
