बीरपुर कार्यालय म आयोजित जनदर्शन कार्यक्रम म सुनीन मनखे मन के समस्या
लउहे निराकरण खातिर दीन हुकुम
रायपुर, 29 अगस्त 2024। महिला अउ बाल विकास अऊ समाज कल्याण मंत्री श्रीमती लक्ष्मी राजवाड़े ह सूरजपुर जिला के बीरपुर स्थित निज निवास म जनदर्शन कार्यक्रम के आयोजन करिन। जेमां क्षेत्र के कई जगा ले आए मनखे मन ह अपन समस्या लेके ऊंखर तीर आए रहिन। ए बेरा म उपस्थित जनसमुदाय के समस्या ल मंत्री श्रीमती लक्ष्मी राजवाड़े ह सुनिन अउ जल्दी समाधान बर संबंधित अधिकारी मन ल जरूरी निर्देश दीन।
कार्यक्रम भिनसरहा 10 बजे चालू होइस जिहां बड़ संख्या म मनखे मन अपन समस्या अऊ शिकायत के संग पहुंचे रहिन। श्रीमती राजवाड़े ह व्यक्तिगत रूप ले हर मनखे के समस्या ल सुनिन अऊ निराकरण बर संबंधित अधिकारी मन ल निर्देश दीन। ए कार्यक्रम के उद्देश्य जनता अऊ सरकार के बीच सीधा संबंध स्थापित करना रहिस, ताकि मनखे अपन समस्या ल बिना कोनो बाधा के सीधा मंत्री तक पहुंचा सकंय।
