मुख्यमंत्री श्री विष्णु देव साय ह हस्तशिल्पी श्रीमती हीराबाई ल प्रदेश के गौरव बढ़ाए म दीन बधाई
रायपुर, 04 सितंबर 2024। छत्तीसगढ़ के श्रीमती हीराबाई झरेका बघेल ल हस्तशिल्प क्षेत्र म वोखर उत्कृष्ट योगदान बर 2023 के राष्ट्रीय हस्तशिल्प पुरस्कार बर चुने गे हे। ये पुरस्कार कार्यालय विकास आयुक्त हस्तशिल्प वस्त्र मंत्रालय भारत सरकार कोति ले देहे जाथे। श्रीमती बघेल ढोकरा बेलमेटल शिल्प के प्रसिद्ध शिल्पकार हे। अधिसूचना के मुताबिक पांच शिल्प गुरू अउ 18 नेशनल हस्तशिल्प पुरस्कार 2023 बर देहे गे हे। मुख्यमंत्री श्री विष्णु देव ह शिल्पकार हीराबाई झरेका बघेल ल छत्तीसगढ़ के गौरव बढ़ाए बर बधाई अऊ शुभकामना देहे हे।
छत्तीसगढ़ के सारंगढ़-बिलाईगढ़ जिला के वनांचल ग्राम पंचायत बैगीनडीह के ढोकरा बेलमेटल शिल्पकार श्रीमती हीराबाई झरेका बघेल एखर पहिली घलोक अपन कलाकारी के डंका बजा डरे हे। श्रीमती बघेल ल बेलमेटल शिल्प कला के क्षेत्र म छत्तीसगढ़ शासन ह साल 2011-12 म पुरुस्कृत करे रहिस हे। वोकर पति श्री मिनकेतन बघेल ल घलोक साल 2006-07 म छत्तीसगढ़ शासन कोति ले सम्मानित करे गए हे। पुरस्कार बर चुने गे शिल्पी श्रीमती हीराबाई झरेका बघेल ह कहिस के मोर पिता श्री भुलाऊ झरेका अउ मोर पति ही मोर प्रेरणास्रोत हे, जे मन मोला ढोकरा बेलमेटल कला सिखाइन अऊ आगू बढ़े बर प्रेरित अऊ प्रोत्साहित करिन।
